Wednesday, August 1, 2007

المائده المستديره

اخواتى المدونات المجاهدات
اخوانى المدونين الاعزاء
بعد مصادمات دمويه ومعارك عنيفه كادت ان تكون مسلحه اتفقنا انا وبهلول على الجلوس الى مائده المفاوضات المستديره
ولاننا كنا متخاصمين خصاما شديدا وبما اننى اردت مكالمته قبل اليوم الثالث على الخصام الا انه ضربنى احلى طناش مشكل ورفض الحديث معى نهائيا وجلس يشاهد حلقات توم وجيرى وهو منهمك اشد الانهماك ...مما اذاد من غضبى وصارحته اننى انما اصالحه قبل الثلاث ايام مثلما علمنا رسول الله صلى الله عليه وسلم ...فارتبك واحس بالندم الا انه لم يتراجع واستمر يشاهد القط والفار
وبعد ان وصل الحال بيننا لدرجه ارسال رسائل لبعضنا واحنا فى شقه واحده ..انا ارسل له ما اطلبه عبر رساله على الهاتف المحمول وهو لانه بخيل كان يخاف من نفاذ الرصيد فكان يكتب رساله ويحاول وضعها فى طريقى ..وبصراحه كنت بدوخه لحد ما اخذ الرساله بالرغم من انى باكون شايفاها
واتفقنا على الحوار البهلولى البهلولى فى الشأن الداخلى وتم فرش طرابيزه السفره كل واحد تولى النصف الخاص به
وطبعا النصف بتاعى كان منسق وجميل والنصف بتاع بهلول كان شنكوتى خالص
المهم بدأت وقائع الافتتاح بطبق رز بلبن مع مكعبات شهد او شمام وشوب عصير مثلج وبعد ذلك قام بهلول بناء على اصراره ان يكون هو البادى بالكلام واخذ يلت ويعجن فى الكلام ويشدد على التشهير به فى لعب البلى وضروره التوقف عن حكاياته القديمه ونوادره
ولان بهلول مفاوض نص كم...بمعنى انه تعبان تفاوضيا فقد طرح كل ما يريد مره واحده ..اى انه رما بياضه على طول وقال اللى عنده
ولاننى مفاوضه محنكه فقد استمعت اليه وتركته يفضى اللى فى بطنه وبعد ذلك قمت بسحبه حبه حبه حتى تنازل عن جميع مطالبه بما فيها موضوع الخروف ......كل هذا لم ياخذ مع بهلوله غلوه
عارفين عملت معاه ايه ؟؟؟؟؟؟؟؟
لم اتبع الاسلوب الحريمى ابدا
وانما اتبعت اسلوب اشد فتكا
عارفين ايه؟؟
اشتريت له ب5 جنيه بلى وقلتله العب هنا فى الشقه براحتك وانا هالعب معاك
وتركته يكسب بمزاجى
فكان يفرح ويتنطط من الفرح
ونسى كل حاجه
وقالى خلاص يا بهلوله اكتبى براحتك وانا مش زعلان

29 comments:

mohand said...

السلام عليكم
هههههههههههههههههههههههههههههههههههههههههه
ايه الذكاء ده
إن كيدهن عظيم

عرفتي ازاي تثبتيه

مكنش العشم يا بهلول يا صديقي

بس اسلوبك ينم عن ذكاء واضح
تحياتي
مهند

بهلوله said...

mohand
مش كده احسن ماهو المثل بيقولك اللى تعرف ديته اقتله
ملحوظه
انا لسه جاييه دلوقتى اهه من مدونتك
وعلقت على موضوع حتسبشوت

آلام وآمال said...

انا كنت داخل اضحك ضحكة أكبر من بتاعة مهند على فكرة

بس خلاص سبقني بها مهند
انا عايز اسأل سؤال بس ارجوكي متفهمنيش غلط

انتو فعلا بتحكو حاجات واقعية ولا دي قصص من تأليفكم ولا المدونة دي اصلا لواحد بس وعامل فيها مجرد شو

والله العظيم السؤال ده لا يحمل اي سوء نية ولا تكذيب
ده مجرد استفسار بس
:)

وعلى فكرة انا من ساعة ما عرفت المدونة دي وانا بزورها ومش بقدر امسك نفسي من الضحك وانا فيها
:)


---------------------------
ف الاخر بقى انا كنت عامل عندي استقصاء ف موضوع
ويهمني جدااااااااااااا رأي حضرتك بجد والله
وياريت كمان رأي الاستاذ بهلول
ولو سمحتي رأي حضرتك يكون منفصل عن رأي حضرته لأني متأكد انكم ممكن تختلفو ف الموضوع اللي انا طرحه
ومنتظركم

عصفور المدينة said...

يا مضيع قضايانا وهازمنا في كل المؤتمرات وجايبنا ورا ومتخصص الشجب والإستنكار
يابطل البلي يا بهلول

أمــانــى said...

ايه الحكاية يا بلهولة فى حد برضو يكون عنده بهلول امور ومطيع كده وبيلعب بلى ويتعمل فيه العمايل دى

بس بس ايه الافترا لالالالالالالالالا بقى يا بلهولة انا كده بقى مضطرة اقف جنب بلهول المسالم واجبله حقه لو فكرتى تفترى عليه
علبة بلى من بتوع ابن اخويا
ههههههههههههههههههههههههههههههههههههههههههههههههههههههههههه
حافظى على بلهول يا بلهوله للمرة التانية بأستميل عطفك
هههههههههههههههههههههه
تحــــــــياتى لكــى يا قمـــــــر

MQabbani said...

هههههههههه

يعني انتي بتعرفي تلعبي بلى؟

بهلوله said...

آلام وآمال
اولا اهلا وسهلا بك
ثانيا بعد السلام يحلى الكلام
انا لن افترض فيك لا سوء النيه ولا سوق العيد
ولكن احب ان ااكد لك ان بهلوله امراه وبهلول رجل وسبق ان حلفت على ذلك
اما قصه واحد عامل شو ده تلاعب بالاخرين
اخيرا ساذهب الى مدونتك ولكن بهلول لوحده ونحن لانتشارك لا فى الاراء ولا فى وقت الجلوس الى النت

بهلوله said...

عصفور المدينه
يا مشبعنا ومغذينا
يا مكبرنا ومقوينا
جانا بهلول جانا
غنو وقولوا معانا
ازيك يا استاذنا عصفور

بهلوله said...

أمــانــى
بس انتى وصى بهلول على انا
عارفه يا امانى
بهلول ده يبان انه غلبان ومسكين لكن لسعته والقبر
ده زى الثعلب بينام وعنيه مفتحه
وواكل الجو فى شغله
وشعله ذكاء ونشاط
لكن فى الحياه العمليه
او
فى تعامله فى الحياه
صفر من عشره

بهلوله said...

MQabbani
فى مثل بيقول
من جاور الحداد ينكوى بناره
وانا مجاوره محترف بلى
فلازم احايله

عصفور المدينة said...

أحد الأخوة أرسل لي الصورة الملونة واقترح علي تغييرها عشان نيولوك يعني
وبعدين الناس اعترضت رجعتها تاني وتوبة
شكرا لقلقك على القائد البطل الرمز عصفور المدينة

حسن ارابيسك said...

الحقيقه
كان نفسى مفاوضات الكيلو 101 سفرة
تكون منقولة على الهوى عبر الفضائيات لكن كل الشكر للمراسلة بهلولةالبهلول من الكيلوا 101 سفرة مفاوضات
الحقيقة التقرير كان ممتاز
وفعلا مفاوضات ومراوغة من بهلولة بطريقة محكمة حطت مكعبات الشمام وطبق الأرز بلبن يعنى اول سلاحها كان تسييل لعاب بهلول
وبعد كده دخلت بهلولة في المرحلة الثانية ببراعة بعد ما خلت الطرف الأخر يجيب يرجع على السفرة ويجيب كل اللي في بطنه

لكن
ما أحزنني يابهلولة
انك ضعيتي اللي كنتي بتخنصريه من وراه واشتريتي بيه بلي
معلش خسارة قريبه ولاخسارة كبيرة
بس عاوزك تخلي بالك يكون بيلعب مرة بالبلي ويحط بليه في بقه تنزل تنحشر في زوره يتخنق هب بس راح الجدع
راح الولد
وياعينى ياعينى ياعينى عالولد
الواد كما اي عيل زي ولاد البلد
سموه على اسم جده زي ولاد البلد
ياعيني ياعينى ياعينى عالولد

ضد الظلم said...

اه منكم اه ربنا يكون فى عون بهلول

ftataljanna said...

بهلولتى حبيتي

معلش ما ردتش بدرى بس النت كان فاصل

المهم

كويس انا بحب الست الذكية

ياللا يا جميل شدي حيلك كده وااخسريله دايما

:D

اسلام رفاعى said...

من اجل رفع الظلم عن النظلومين
عذرا للتحليق خارج السرب
ادعوكى للمشاركة فى حملة المطالبة بالافراج عن طلاب الاسكندرية المختطفين
التفاصيل بمدومنتى

بهلوله said...

عصفور المدينة
شكرا على اهتمامك بالرد

بهلوله said...

حسن ارابيسك
عارف يا ابو على
اكتر حاجه مجننه اللى بالى بالك
هو تعليقاتك
بيولع منها
التعليق اللى فات لما بتقول فضى له اوده هو واصحابه الصغيرين
قعد يقولى شوفى ارابيسك بتاعك كاتب ايه
دنا كده بقيت كوره شراب
ولسه لما يقراء التعليق ده كمان
ولا يمكن قراه
وخد فى سنانه وعلى المأذون عدل
ونقعد نقول
جواز بهلول من بهلوله باطل
باااااااااطل

بهلوله said...

ضد الظلم
باين عليك واخد رشوه
اطلع من دول واعترف لوحدك
محدش هيمد ايده عليك
اعترف احسن لك

بهلوله said...

ftataljanna
حبيبتى ان بقلق عليكى قوى
احب ارى نور تعليقك دائما
لكى احلى سلام
من بهلوله

بهلوله said...

اسلام رفاعى
ساشارك فى الحمله

عازف الناى said...

احسن حاجه عملتيها يا بهلوله
بس الخوف انك تتعودى انتى كمان على لعب البلى
وتضيعوا عيال الحى كله
وممكن تاخدوا البلد فى وشكم

آلام وآمال said...

انا لسة جاي من عند استاذ بهلول دلوقت حالا ولقيت كلام عن حضرتك مزعلني خالص
يارب الموضوع يتحل على خير

وعلى فكرة انا بهدي النفوس متفهمونيش غلط

:) :)

----------------------
شكرا جدا على اهتمامك بالاستقصاء وابداء رأيك

حراس الحقيقة said...

برااافووووووووو
يا بهلوله
عارفه لو مكنتيش كسبتى التفاوض اللى معرفش عن ايه ... كنت هزعل جدا

سكتم بكتم said...

هو ده قمة الذكاء

الست الذكية تعرف أن الراجل طفل كبير لو عاندتيه يرفس في الأرض ويحرن

ولو كلتي بعقلة رز بلبن ومهلبية يبقي في أيدك زي الحلاوة السمسمية

وأنتي عارفة الرجال أحباب الله

تحياتي لذكائك

بهلوله said...

عازف الناى
لا متخافش قوى على بهلوله
انا لعبت معاه لغرض ما
طبعا فاهمنى

بهلوله said...

آلام وآمال
عندك حق تزعل
لكن يا جماعه الموضوع ده قديم جدا
وبهلول مش لاقى حاجه يكتبها
عمل زى التاجر لما يفلس

بهلوله said...

حراس الحقيقة
شكرا جدا
وياريت اكون عند حسن ظنك

بهلوله said...

سكتم بكتم
مش كل الرجاله
فى رجاله عقلها يوزن بلد
وفى بهاليل يا عينى على الولد

ما علينا said...

انت كدا يا بهلولة
بتعملي جماهيرية لبهلول

وبتتبرعي له بتعاطف جمهورك
فين بقى كيدهن العظيم
لما تظهريه طيب وسكر كدا
وقلبه ابيض ولا عنده لؤم ولا خبث

كل جمهورك الغفير هايتعاطف معاه
ابقى خدي بالك البوستات اللي جاية بقى

بس بذمتك
مش لعب البلي ممتع
انا بالعب برضوا مع اولاد اخواتي