Saturday, October 6, 2007

اسبوع فى نجع حمادى

قبل اسبوع وبالتحديد يوم الخميس رن تليفون بهلول المحمول وكانت المكالمه من اهله فى نجع حمادى حيث اخبره المتحدث ان والدته مريضه جدا وتتطلب رؤيته
ودق بهلول نفير السفر استعدادا للذهاب الى الصعيد وسافرنا فجر الجمعه الى نجع حمادى
وكانت تلك اول زياره لى الى الصعيد حيث يوجد اصول عائلتى انا وبهلول
وكان بهلول قد سافر كثيرا الى هناك وقد ولد وترعرع هناك واخذ الثانويه العامه من هناك
اما انا فكان مولدى قاهريا وحتى والدتى قاهريه المولد
المهم ركبنا القطار المتجه الى الصعيد وانا احلم برؤيه الصعيد كما رايتها فى فيلم الارض وفى الحرام وفى صراع فى الوادى
ولكن بهلول اخبرنى ان كل شىء قد تغير تماما فانتظرت القليل حتى احكم بنفسى
وصلنا عبر طرق ممهده الى باب المنزل حيث كان هناك حشدا كبيرا من اهلنا فى الانتظار حتى احسست اننا مشهورين جدا
وكان نصيبى عده قبلات حاره من نساء لا اعرفهن مطلقا وكل واحده منهن امطرتنى بوابل لا بأس به من القبلات واعترف وبلا حسد انهن كن نساء قويات جدا حتى اننى احسست ان البلد مازالت بخير
ولم تكن النساء وحدهن ولا الرجال هم المرحبون بنا فقط وانما جيوش من الحشرات تركت الكل واخذت ترحب بالضيوف فقط حتى اضطررت للذهاب لاخذ حمام اكثر من مره
واطمئننا على صحه ام بهلول حيث اصابها مرض نطلق عليه هنا لقب البرد او الانفلوانزا
المهم لم القى بالا حيث ان صله الرحم مهمه جدا
وبعد يومين عزمتنا خاله بهلول على الافطار وكان منزلها على بعد عده كيلو مترات داخل الاراضى الزراعيه ولم تكن هناك وصيله للمواصلات سوى الحمير
ولكننى رفضت رفضا مطلقا ان اركب حمار
فقالوا لى ان ملابسك القاهريه وجزمتك لن ينفعوا فى الطريق
وتحت اصرارهم قمت بتغير ملابسى وارتديت حذاء نسائى بلاستيك محلى الصنع ولسه بخيره لم تمدت اليه يد الصين ولا تايوان بعد
ذهبنا فى ركب من خمس سيدات وثلاثه رجال واطفالنا واصر بهلول على ركوب الحمار
واخذ يجرى ويلعب بالحمار وفاكر نفسه صلاح الدين الايوبى واخذ يركض ويعود الى ان وقع على الارض وكان من نصيبه عده ضحكات مكتومه من النساء وكلمات مثل اسم النبى حارسك ياخويا...وما يقع الا الشاطر...وحوش اللى وقع منك
المهم سيده بروح رياضيه عاليه اخرجت الكره خارج الملعب لعلاج اللاعب المصاب وقام ابن عمه بعمل الاسعفات الاوليه لبهلول وكنت خايفه جدا على بهلول ليس بسبب الوقعه وانما بسبب العلاج الطبيعى من ابن عمه حيث كان طوله اكثر من مترين وعشر سنتيمتر وكانت كفه يده مثل كفه الميزان وكان بيفرك رجل بهلول بضمير
الى ان صرخ بهلول وقال له بالراحه يا همام انت فاكر دى رجل زى رجلكم
وضحكنا جميعا
واصر بهلول على ركوب الحمار مره اخرى
وركب الحمار واخذ يستعرض اكثر من الاول
وكل القافله تقول له خلى بالك يا بهلول الى ان وقع مره اخرى فى قنايه ميه وهنا تعالى صوت الجميع منن الضحك الا انا فكدت اموت من الغيظ على هذا الرجل الطفل
ولم يجد ابن عمه مفر من خلع جلبابه واعطائه لبهلول واخذ جلباب بهلول
فكان الاثنين بهاليل
بهلول فى جلباب اكبر منه والاخر فى جلباب مثل جلباب سعيد صالح فى مسرحيه العيال كبرت
واصر بهلول على ركوب الحمار ولكن ابن عمه كان اسرع منه حيث ضرب الحمار وامره بالعوده الى المنزل وفعلا هرب الحمار وكأنه يهرب من بهلول وشقاوه بهلول

Wednesday, September 19, 2007

الراجل ده هيجننى

كان عندها حق صباح بنت ام صباح لما غنت للمرحوم فؤاد المهندس الراجل ده هيجننى
تقولش الرجاله فى رمضان فاكرين نفسهم هما بس اللى صايمين
طيب ماحنا كمان صايمين
وبنروح الشغل زينا زيهم
ولا
علشان محدش يزعل منى
هاتكلم على نفسى انا والمايسترو بهلول
يجى رمضان وخناقه يزيد عايز طباخه سكه حديد
بجد يا جماعه
من العصر للمغرب
وكأنى انا المسئوله عن الصيام فى الرايحه والجايه عمال يبص لى ويقولى خلاص الاكل ؟
عملتى ايه النهارده ؟
جبتى فاكهه ؟
جبتى مخلل ؟
هو المغرب اتأخر كده ليه ؟
عصرتى مانجه ؟
جبتى عرقسوس ؟
عملتى كنافه ؟
انا عطشان
انا جعان
انا همدان
ويقعد شويه فى الصاله ويروح على الصالون للبلاكونه للمطبخ للصاله للصالون لما خلانى هطق
اقوله يا بهلول اعقل كل الناس صايمه مش انت بس واعمل حسابك انى صايمه زيك بالظبط
يقولى
انتى بتاكلى كتير فى السحور
طيب ما الاكل قدامه ما ياكل هو انا حوشته
ياله ماعلينا
كل سنه وانتم طيبين
ومره تانيه
بهلول ده هيجننى

Thursday, September 6, 2007

مشاعر بهلوليه

سعيده يا احلى بشر
المشاعر والحياه
انا عندى 34 سنه يمكن يزيدوا هبابه او يقله هبابه ولكن خلينا نقول 34 سنه
بهلولى
او
زوجى الاستاذ بهلول عدى الاربعين ب3 سنين
مشاغل الحياه بتخبط فينا زى الخبط فى الحلل بالظبط
زمان ايام الخطوبه
كان بهلول لازق عندنا زى لزقه الغراء تماما
كان بيجى من شغله على بيتنا ياكل ويشرب ويقعد معانا لغايه العشاء يتعشى ويروح بيتهم
كل يوم على دى الحال
بس علشان الظلم حرام
الا يوم الجمعه
كان بيجى من الصبح ونروح انا وهو نصلى الجمعه
ويرجع يتغدى ويستنى العشاء
لغايه ما الحاجه والدتى كانت بتعمل حسابه فى اللحمه والفراخ وكل حاجه كأنه مكتوب معانا على البطاقه
وكان فى الرايحه والجايه يقعد يتغزل فيا
ويقول كلام معسول
وهو لخمه فى الكلام لكن ما علينا اهو كان بيطلع مشاعره
السؤال
المهم
جدا
فين المشاعر دى ؟؟؟
ليه لما الزوجين يمر عليهم قرن من الزمن زى انا وبهلول يبقى كل كلامهم عن المصاريف والاكل والشرب وفلانه قالت وعلانه سوت ؟؟
مره بضحك انا وبهلول وقلت له ما تيجى نرجع ايام الخطوبه
تتصوروا قالى ايه ؟
بص لى من فوق لتحت بكل بلاهه وقالى
ومين هيدفع لى ال200 جنيه اللى دفعتهم للمأذون ؟؟؟
ياااااااااااااااااااااااااااااااه
هل ده تفكير الرجاله بعد الزواج ؟؟؟
ولا احنا يا ستات مزودنها شويه ؟؟؟؟
كفايه علينا مشاعر الحب فى الخطوبه
يمكن هننهب
على العموم اخوانى المدونين واخواتى المدونات
تعرفوا
وارجوا ان تصدقوا
ده كان حوار لى مع بعض السيدات يحملن نفس المشكله بابعاد مختلفه ولكن فى النهايه تتلاقى الاراء
كانت كل سيده تحكى بحرقه عن اهمال زوجها لها
واتفقت الاخوات النسووات معى على ان فتره الخطوبه لن تعوض

Tuesday, August 28, 2007

الدروس الخصوصيه


سعيده يا احلى بشر
انتطلقت الشعله الاوليمبيه لالعاب الدروس الخصوصيه 2007-2008 وبدء موسم العك الكروى قصدى عك الدروس الخصوصيه
وبدء كل مدرس فى تحويل التلاميذ الى ارقام ومجموعات
مجموعه ا من الساعه كذا للساعه كذا....مجموعه ب من الساعه كذا للساعه كذا....الخ
وياويله يا سواد ليله اللى ينضم متأخر يترحل لنص الليل
والتسعيره السنه دى غاليه عن السنه اللى فاتت
مش عارفه ليه ؟
يمكن يكونوا حسنوا الانتاج ؟
او علشان الجمارك ؟
او علشان الحاجه غليت يبقى بالمره الدروس تغلى ماهو سوق عرض وطلب
وعمتى وعمه ابويا وجدى الحكومه باشا بيقولوا انها بتحارب الدروس الخصوصيه
الحرب مستمره بين الطرفين لعده سنوات
مسمعناش عن اى تقدم ولا ضرب صواريخ سكود ولا باتريوت ولا حتى صواريخ رمضان
الحرب مستمره وخلاص
عايزين نعرف هى كلها حرب شتيمه وخربشه وعض بس ولا ايه ؟
ولا فريق واقف فى اول الاسكندريه على البحر والتانى فى اخر اسوان عند الحاجه حلايب وشلاتين
والفريقين بيبعتوا لبعض رسايل تهديد ووعيد مع السلحفاه سوسو خريجه حديقه حيوان الجيزه ؟
الواضح ان الحكومه مش راح تسكت لا
اكيد بتجهز جنود اكفاء لهذه الحرب الشنعاء واكيد مستنيه الجنود دول لما يتولدوا وعلينا وعليكوا بخير
الدروس الخصوصيه سرطان التعليم
بدأت
وعلى المتضرر اللجوء للمرايه علشان يشوف حلمه ودنه

Wednesday, August 22, 2007

مصاريف رمضان والمدارس


سعيده يا بشر
شفتوا الهنا اللى فيه بهلوله
ومش بهلوله بس لا يا عسل ده كل الشعب المصرى
رمضان جاى كل سنه وانتم طيبين وبعده ب3 ايام المدارس
طب اجيب منين
طلبات البيت فى رمضان مولعه ومصاريف المدارس قد الجبل الكبير اللى بلع امه وابوه جوه بطنه
ودلوقتى عاملين انا وبهلول هاف تايم او راحه بين الاشواط حكم احنا معندناش شوطين لا احنا عندنا كبشه لا قفه اشواط
طيب احنا واخدين الهدنه دى من امبارح وفاضل كام يوم على مصاريف الشهر وانشاء الله هتحصل مجزره ولا مذبحه القلعه بتاعه عم محمد على
سيبكم من بهلول وبهلوله
وخلونا نتكلم عن باقى الشعب
انا الشعب
انا فردايه من الشعب يبقى من حقى اتكلم عن الشعب
مش من حق الحكومه تخليها جدعه حبتين فى رمضان وتخفض مصاريف المدارس شويه
مش من حقنا عليها تزكى علينا احنا الغلابه المطحونين
يعنى تخلى المصاريف النصف
وتدى لكل طالب عشر كشاكيل وعشرين كراسه زى زمان وتحسبه زى الزكاه مش هنقول زكاه لا نقول زى الزكاه
واحنا ولادها برضه وهى امنا
مش بنقول مصر هى امى نيلها جوه دمى
صدقونى انا صعبان عليا الناس الغلابه الكتير
ربنا معاهم ومعانا
ورمضان كريم
والمدارس تحاول الدوله تخليها كريمه
اوعى يا حكومه تزعلى انا مش بتكلم فى السياسه ولا اعرف
انا فردايه من الشعب بتكلم عن مشاكل الشعب
وقريبا هتكون مشكلتى مع بهلول

وربنا يستر

Tuesday, August 21, 2007

بدون مفاوضات

الحمد لله

اخيرا تم حل الموضوع سلميا

وانا اشكر بهلول على هذه الخطوه

وان كان قد كسب منى الجوله

الا اننى اشكره

Saturday, August 18, 2007

سعيده يا احلى بشر
خبر هام
الى كل المدونين والمدونات
فزوره
كائن حى من الثدييات
عاش اسلافه فى العصر الجليدى
يعيش فى البر
يتغذى على الاعشاب وبعض الحيوانات
يخرج اصوات غير مفهومه
يتناسل بالتكاثر
عديد الخلايا
اقتناه بعض الهنود الحمر
يكسوا راسه بعض الشعر فى القفا ومن الجوانب
يصدر اصوات رهيبه اثناء نومه
يكره الماء والصابون
عنده شعره ساعه تروح و23 ساعه تيجى
يحب لعب البلى
ويلعب مع العيال
ويوسخ هدومه
وينضرب على ايده علشان النظافه
مين هو ؟؟؟
من يعرف الحل يرسله الى العنوان التالى
شارع المطحونه الغلبانه بهلوله منزل رقم 55 الدور الرابع

Monday, August 13, 2007

لك يوم يا بهلووووول


سعيده يا اجمل واحلى بشر
شوفتوا بهلول عمل ايه ؟؟؟
كتب تدوينه عن ذهابى للدجالين والشيخه محسن علشان كتر الزعل بينا والخصام المستمر
وانا قبل ما يكمل بقيه الحكايه اعترف وبكل امانه اننى ارتكبت اكبر غلطه فى حياتى بالذهاب للناس دول واعترف اننى لم اكن غلطانه وبس لا قولوا على بهلوله اى صفه وانا اتحملها
هبله عبيطه جربانه حفيده ام سحلول انا موافقه ومعترفه بغلطتى
وانا عارفه ان بهلول مش راح يسكت
دا فى مواضيع كتير فى الحكايه لو انهف فى عقله وحكاها هتزعلوا جدا منى ولكن انا بقول لكم من الان يا جماعه انا غلطت واتحملت نتيجه غلطى من راس الافعى ..قصدى من راس الحكمه.. بهلول افندى ومن زميلاتى فى العمل ومن اختى ومن اخويا ومن ناس كتير ...لما الجاموسه بتقع سكاكينها بتكتر ..وفعلا خرمولى كل حته فى جسمى بالكلام المعتق المنقوع فى ميه المش ..
انا ندمت على اللى حصل منى
واحب ان اعرفكم
ان الجنرال المتقاعد حفيد ام قويق بهلول التاسع والتسعين بعد المائه التاسعه ..سليل عائله محمد بكر الكبير (مين محمد بكر الكبير) خليها فى سركم
المهم ان بهلول بجلاله قدره بعد ما كتب التدوينه دى وحس ان انا اتضايقت جه يساومنى انى ابطل كتابه عن هيافاته ونوادره العياليه فى مقابل الا يكمل بقيه الاحداث
انا رفضت لانى لا اقبل المساومه فى اى شىء وقلت له انا عارفه ان اصدقائى هيزعلوا منى لكن ده ماضى وانتهى وانا عرفت غلطتى وخلصت الحكايه
انا عارفه ان الاحداث اللى هيحكيها المعلم بهلول صعبه عليكم ولكن ما يطمئننى انها حدثت فى الماضى
كلمه اخيره
كلمه مهمه
كلمه خطيره
استحمل بقى يا ابو البهاليل اللى هيحصل لك من بهلولتك

Wednesday, August 1, 2007

المائده المستديره

اخواتى المدونات المجاهدات
اخوانى المدونين الاعزاء
بعد مصادمات دمويه ومعارك عنيفه كادت ان تكون مسلحه اتفقنا انا وبهلول على الجلوس الى مائده المفاوضات المستديره
ولاننا كنا متخاصمين خصاما شديدا وبما اننى اردت مكالمته قبل اليوم الثالث على الخصام الا انه ضربنى احلى طناش مشكل ورفض الحديث معى نهائيا وجلس يشاهد حلقات توم وجيرى وهو منهمك اشد الانهماك ...مما اذاد من غضبى وصارحته اننى انما اصالحه قبل الثلاث ايام مثلما علمنا رسول الله صلى الله عليه وسلم ...فارتبك واحس بالندم الا انه لم يتراجع واستمر يشاهد القط والفار
وبعد ان وصل الحال بيننا لدرجه ارسال رسائل لبعضنا واحنا فى شقه واحده ..انا ارسل له ما اطلبه عبر رساله على الهاتف المحمول وهو لانه بخيل كان يخاف من نفاذ الرصيد فكان يكتب رساله ويحاول وضعها فى طريقى ..وبصراحه كنت بدوخه لحد ما اخذ الرساله بالرغم من انى باكون شايفاها
واتفقنا على الحوار البهلولى البهلولى فى الشأن الداخلى وتم فرش طرابيزه السفره كل واحد تولى النصف الخاص به
وطبعا النصف بتاعى كان منسق وجميل والنصف بتاع بهلول كان شنكوتى خالص
المهم بدأت وقائع الافتتاح بطبق رز بلبن مع مكعبات شهد او شمام وشوب عصير مثلج وبعد ذلك قام بهلول بناء على اصراره ان يكون هو البادى بالكلام واخذ يلت ويعجن فى الكلام ويشدد على التشهير به فى لعب البلى وضروره التوقف عن حكاياته القديمه ونوادره
ولان بهلول مفاوض نص كم...بمعنى انه تعبان تفاوضيا فقد طرح كل ما يريد مره واحده ..اى انه رما بياضه على طول وقال اللى عنده
ولاننى مفاوضه محنكه فقد استمعت اليه وتركته يفضى اللى فى بطنه وبعد ذلك قمت بسحبه حبه حبه حتى تنازل عن جميع مطالبه بما فيها موضوع الخروف ......كل هذا لم ياخذ مع بهلوله غلوه
عارفين عملت معاه ايه ؟؟؟؟؟؟؟؟
لم اتبع الاسلوب الحريمى ابدا
وانما اتبعت اسلوب اشد فتكا
عارفين ايه؟؟
اشتريت له ب5 جنيه بلى وقلتله العب هنا فى الشقه براحتك وانا هالعب معاك
وتركته يكسب بمزاجى
فكان يفرح ويتنطط من الفرح
ونسى كل حاجه
وقالى خلاص يا بهلوله اكتبى براحتك وانا مش زعلان

Friday, July 27, 2007

لعب العيال


سعيده يا بشر
سى السيد بهلول صحى من سباته ودون تدوينه ضدى
على العموم جنت على نفسها براقش
وانا اليوم فاضيه لبهلول وهافرش له الملايه وهفرج عليه حوارى المدونات
دا نوادره بالحيل اكوام اكوام
من سنتين وفى اول رمضان دخل عليا المحروس بهلول التاسع عشر حفيد محمد صلاح عبده ملك بلاد الترعتين ومؤسس الحضاره النطاطيه ...حضاره النط بالحبل وهو على الارض..جانى ومعاه 3 كور كفر من النوع الغالى وعليهم امضاء رونالدو بالعربى ...انا متاكده ان البائع هو اللى ماضى له عليهم...المهم وجايب معاه كمان 2 شبكه بتاعه الجون و3 شورتات و3 فانلات عليهم ارقام بس المضحك انهم نفس المقاس ونفس اللون ونفس الرقم باين عليه عامل لهم كوبى بست ..وقالى بهلوله انا هاشترك فى الدوره الرمضانيه المركزيه لكره القدم.....الاسم لوحده خلانى افتكر انه هيلعب فى كاس العالم للاجداد
المهم كل يوم يرجع من الشغل يلبس الشورت والفانله وياخد معاه بقيه اخوتهم فى شنطه رياضه ويمسك كوره وينزل....بصراحه فوت علينا عزومات رمضان كلها ...بحجه انه مشغول بالدوره
وفى يوم وكان حوالى 18 او 19 رمضان خبط الباب قلت لنفسى مين يا بت يا بهلوله اللى بيخبط طب ما فى قدامه جرس وتحت انتر كم المهم بصيت فى العين السحريه لقيت طفل صغير فتحت الباب قالى ازيك يا طنط بهلوله
قلت له وانا مستغربه ازاى عرف اسمى ازيك يا حبيبى عاوز مين ؟؟
قالى عم بهلول بيقولك هاتى كوره من دولابه علشان الكوره التانيه سكنت
انا مش عارفه يعنى ايه سكنت فسالته سكنت ازاى فسكت الولد حايلته وطبطبت عليه وسالته قالى بصراحه عم محمد البواب خدها مننا ومش عاوز يديها لحد ولا لعم بهلول
قلت له هو انت بقى اللى بتلم لهم الكور
قالى انا كابتن الفريق
قلت له وبقيه الفريق قد ايه
قالى كلهم قدى
قلت له وعمك بهلول بيلعب معاكم ؟
قالى لا ده هو الحكم ومبيرفش يحكم الفاول يحسبها لمسه يد والاوت كرنر والاوفسيت بلنتى
قلت له وليه كل ده شوفو حكم غيره
قالى ما هو اللى مشترى لنا الفانلات والشورته والكور وبيدينا جوايز الفايز والمغلوب وبقعد معانا بعد الماتش يلعب معانا بلى للمغرب
الواد صدمنى طب ليه كده يا بهلول .....بلى فى الشارع ...وكوره مع العيال
واول ما جه وقلت له ما سمعته
قالى ايه يا بهلوله الاطفال احباب الله خلى مخك كبير
قلت له يا بهلول ايوه الاطفال احباب الله لكن منظرك ايه لما البواب ياخد منك الكوره وميرضاش يدهالك وتقعد تلعب بلى فى الشارع حرام عليك انتى فى الاربيعينات
سكت وتانى يوم لبس الفانله والشورت وخد معاه كيس البلى اللى مان بيخبيه فى الشنطه
حد يرضيه كده ؟؟؟؟؟؟؟؟

Wednesday, July 25, 2007

بهلول اعترف

بهلول اعترف فى مدونته بحكايه الخروف وبيهددنى

Monday, July 23, 2007

خروف العيد

مساء الخير يا احلى بشر

تتصوروا اول خناقه بينى وبين بهلول بعد العمليه بسبب ايه

مش هتصدقونى

بسبب خروف العيد

امبارح بعد العصر رن الانتركم رديت لقيت البواب بيسأل عن بهلول علشان واحد جاى له زياره قلت له خليه يطلع ودخلت جوه المطبخ اجهز الساقع وسيبت بهلول يستنى الضيف شويه وجالى بهلول وقالى تعالى يا بهلوله سلمى على الضيف مفسش حد غريب ده استاذ محمد صاحبى بتاع القليوبيه

خرجت وفى ايدى واجب الضيافه ودخلت الصالون وسلمت على الضيف لكن وانا داخله لمحت بعينى اربع سبايت (جمع سبت)فلاحى قلت فى سرى يا دين النبى الله اكبر ياحلاوه يا ولاد ايه ده كل دى زياره قعدت اضايف الراجل وعينى على الزياره عماله اقول لنفسى قب يا بت يا بهلوله اكيد سبت مليان زبده وجبنه وسبت مليان وز وبط وفراخ وحمام وسبت مليان مانجه وفواكه وسبت مليان فطير مشلتت والذى منه ...اشطه بالهبل يا بهلوله زياره عشر نجوم

وطبعا لان الراجل جاى من مشوار يهد الحيل جهزت لقمه خفيفه المهم اتسترت والحمد لله

الراجل قعد للمغرب وانا نفسى ومنى عينى اعرف ايه اللى فى السبت

المهم بعد المغرب استاذن وتوكل على الله وبهلول وصله لعربيته اسفل العماره

وانا انفردت بالفريسه اللى بقالى ساعات وانا بخمن دى ايه

اول سبت فتحته طلع دره شامى

تانى سبت طلع دره شامى

تالت سبت طلع دره شامى

رابع سبت برضه دره شامى

انا بصراحه اندهشت ايه ده هو الراجل فاكرنا بديول ولا ايه ؟؟؟؟؟

ولا يمكن بهلول هيتاجر فى العلف؟؟؟؟؟؟؟؟

المهم جه المحروس بسلامته بهلول باشا...واول ما دخل قالى

طبعا فتشتى فى الحاجه يا بهلوله؟

ايه ده يا بهلول؟

ده علف انا طلبته من محمد صاحبى علشان الخروف

خروف ايه؟

خروف العيد يا بهلوله

قلت له وانا حاسه ان العمليه هتنفجر

العيد فاضل عليه 5 شهور واحنا متعودين نجيب الخروف يوم الواقفه هياكل كل ده فى يوم

قالى وهو بيضحك براحه على نفسك يا بهلوله انتى لسه تعبانه انا هاقولك على كل حاجه.......من كام يوم بنحكى انا ومحمد عن اللحمه وخروف العيد قالى انا باجيب الخروف قبل العيدب 7 او 8 شهور واعلفه للعيد يبقى ميه ميه قلت له خلاص هاتلى كام شوال دره وكام شوال فول علشان لحم الخروف يبقى احمر وكام شوال عيش وانا هاشترى خروف صغير واعلفه انا بطريقتى والشقه هنا واسعه وممكن نفضى له اوده

صوت فى وشه وقلت له وانا بصرخ زى المجنونه

خروف فى الشقه يا بهلول حرام عليك انت جاى من انه كوكب......انت هتعمل الشقه زريبه 5 شهور

حرام عليك

حرام عليك

حرام عليك

حرام عليك

يا جماعه حد يقوله حاجه قبل ما اجيب الاكياس البلاستيك

Friday, July 20, 2007

شكرا لكل من سال عنى


سعيده يا احلى بشر
اخواتى المدونات اخوانى المدونين
ليدس فرست
اشكركم جدا جدا جدا
اتوجه بالشكر للبنت الجميله ذات الاسم اللى على مسمى فتاه الجنه وهى انشاء الله من اهل الجنه اشكرها كتيييييييييييييييييييييير قوى وللصبح ولو هى قدامى دلوقتى كنت حدفتها بالورد من النوع الغالى مش النوع اللى كان بهلول بيجيبه فى المستشفى ابو تلاته جنيه الا ربع وطول ما هو قاعد جنبى عمال يذلنى شمى يابهلوله .......ده ورد يا بهلوله......ده من الغالى يا بهلوله........شمى وانتى تروقى يا بهلوله.........انا جايب ورد زى الافلام يا بهلوله........انا عملك زى البطله يا بهلوله...... انتى مش عارفه انا صارف كام لغايه دلوقتى يا بهلوله
العمليه مكلفانى كتير يابهلوله
وطبعا فى سره عماله يقول الله يخرب بيتك يا بهلوله
لكن اقولكم على سر بهلول وقف جنبى وانا فى المستشفى جامد قوى وانا سعيده بكده ولو انه كان بياكل اكلى وكل الفاكهه اللى كان الناس بيجبوها وكل ما اقوله هات حته يا بهلول يقولى النظام الغذائى يا بهلوله لازم تحفظى عليه
طب كل بره الاوده يا بهلول علشان ريقى بيجرى على الفاكهه
يقولى .-عايزانى اكل قدام الناس يا بهلوله انتى بصى الناحيه التانيه وانا باكل
اجيبه يمين اجيبه شمال هو هو مش نافع معاه اى حاجه
وكمان اشكر كل من سأل عنى وكل من كتب لى كلمه فى مدونتى وكل من كتب لى فى مدونه فتاه الجنه
واتوجه بالشكر لبهلول ولو انه مش فاضى من امبارح من ساعه ما روحنا البيت وهو جايب ورقه وقلم وعماله يحسب
صرف كام ويقول الارقام بصوت عالى وانا مطنشه على الاخر

Wednesday, July 18, 2007

بهلوله بخير

الحمد لله بهلوله عملت العمليه وهى الان كويسه وسوف تغادر المستشفى غدا
وبمجرد خروجها من غرفه العمليات كنت قد صورت لها التعليقات الموجوده فى مدونتها
وصورت لها البوست الموجود فى مدونه فتاه الجنه فبكت من الفرح وظلت تقبل الصوره والبوست طويلا وتحمد الله وتشكر فتاه الجنه كثيرا وتشكر كل من سئل عنها وستكون معكم قريبا
الكاتب بهلول

Saturday, July 14, 2007

بهلوله فى المستشفى

بهلوله فى انتظار اجراء عمليه جراحيه يوم الاربعاء 18-7-2007
ادعو لها بالشفاء

بهلول

Saturday, July 7, 2007


عندما قمت انا وبهلول بعمل مدونه بهلوله ومدونه بهلول لم نكن نتوقع حدوث مشاكل بيننا ...الا ان هناك بوادر مشاكل وغضب من ناحيه بهلول
وبعد جلسه عائليه استمرت اكثر من 7 دقائق شرحت لبهلول ان المدونتين ربما تساعدانا فى حل مشاكلنا ونقوم بعمل تواصل بيننا وبين اصدقائنا كما انها من الممكن ان توعى الناس عن بعض المشاكل الزوجيه وان كان فى محيط ضيوفنا فقط
فتفهم بهلول الامر ووعد الا يغضب وترك لى حريه كتابه ما احب ..........
واليوم سوف احكى لكم عن تدخل البعض فيما لا يفهمه
منذ حوالى 7 أو 8 سنين جاءنى بهلول وانا فى المطبخ بعمل الاكل وهو بينادى من الصاله زى عادته بهلووووله بهلووووووله
خير يا بهلول فى ايه
- امسكى الخشب الاول
-اهو يا عم بهلول خير عامل هليله ليه
-انا نويت اعمل مشروع هيكسب دهب
بصراحه يا جماعه انا حطيت ايدى على قلبى مانا عارفه بهلول ومشاريعه المبهلله يعمل المشروع ويخسر ويرجع يعيط زى العيال الصغيره
- خير يا بهلول مشروع ايه المره دى
- مشروع بلاى استشن
- دنتا اللى معاك كلهم 130 الف جنيه والمشروع ده عايز ملايين
- ملايين ايه يا بهلوله دول كلهم 10 الاف جنيه
- هو انت هتعمل مصنع ب 10 الاف جنيه
- هههههه ضحكتينى يا بهلوله مصنع ايه انا هاعمل دكان العاب بلاى استشن للاطفال
ساعتها انا كنت عايزه اكل الراجل ده باسنانى وقلت له وانا متغاظه
- دكان ايه شغل العيال الصغيره ده اعقل يا بهلول انت عندك 33 سنه (دلوقتى 41 سنه) عيب عليك وبعدين انت مش محتاجله المشروع ده
- هو انا هالعب معاهم انا هأجر الدكان واجيب 3 اجهزه بلاى استيشن و3 اجهزه تليفزيون والواد محمد ابن خلف بتاع الكشك هيقف فيه ويجيب لى الايراد كل يوم من غير ما اتحرك من مكانى كل يوم على اقله 100 جنيه صافى يعنى 3 شهور والم حقى وابداء فى المحصول يا بهلولتى
يا بهلول اعقل يا بهلول كانى مانى راسه والف سيف لازم يعمل المشروع ...سبته على راحته وعلى راى المثل اللى معاه فلوس بتحيره يجيب حمام ويطيره
المهم يا جماعه عمل بهلول المشروع اللى فرج علينا العماره وامه لا اله الا الله العيال تتخانق فى الدكان يطلعوا ينادوا بهلول يصلحهم على بعض ..الابهات بتوع العيال يجوه يشتكوا ويزعقوا ان ده سرقه لفلوس عيلهم ...عيل ينادى من تحت يا عم بهلول محمد خد الفلوس منى ومش راضى يلعبنى ومحمد يقول ده لعب اكتر من نص ساعه وخد زياده عن حقه ...وكل يوم الواد محمد يقول له اشترينا انهارده دراع ومره مومرى ومره اسطوانات ومره عيل كسر كرسى لغايه لما فى يوم دخلت لقيت بهلول بيكلم نفسه فى المرايا ويقول انا اللى جبته لنفسى
-وانت مزعل نفسك ليه يا بهلول شيل ده من ده يرتاح ده عن ده
- عندك حق يا بهلوله انا غلطان بلاى استشن ايه وزفت ايه انا ها بيعه ولو بخساره
وفعلا خسر بهلول 4 الاف جنيه بعد ما باع الاجهزه وقعد زى عادته يعيط زى العيال الصغيره على الفلوس ويخبط راسه فى الحيط ويقول ده غلتطى انا اللى ما سمعتش كلام واحد زميلى قالى بلاش البلاى ستيشن وافتح دكان تاجير عجل بيكسب بلاوى
سبته ومشيت ما هو بهلول هيفضل بهلول

Thursday, July 5, 2007

مصيف 9 نجوم


سعيده ياحلى بشر
اختكم بهلوله النهارده متواصله معاكم كام س
اعه علشان بهلول راح مع صحابه يتفسح وسابنى هنا فى البيت وحتى مقليش ولو عزومه مراكبيه تعالى معانا رغم ان فيه ناس واخده ستاتهم وعيلهم معاهم ورغم كمان ان انا لمحت له انى عايزه اخرج اشم هواء عمل نفسه مش سامعنى امت ساكته
المهم يا جماعه الفسحه دى فكرتنى بنادره من نوادر بهلول وما ادراك ما نوادر بهلول اكيد كان جده الكبير جحا ...مش هاضيع وقتكم راح احكيلكم على اللى حصل
من حوالى سنه وبالتحديد فى شهر 8 اللى فات جيت من الشغل بدرى وعملت اللى ورايا من شغل البيت والاكل ونمت شويه محستش الا بصوت بهلول وهو بينادى بصوت عالى جدا جدا رغم انه كان واقف جنب السرير قمت من النوم مفزوعه على صراخه بهلووووووله بهلوووووله بهلوووووله انا قلت الدنيا خربت وافتكرت اللى حصل منه يوم الزلزال سنه 92 كنا لسه مخطوبين وكان لازق عندنا زى الوطواط كل يوم كل يوم مش فاكره انه اخد يوم واحد اجازه المهم وقت الزلزال على ما اتذكر كان العصر المهم انه برضه كان عندنا زى عوايده اول ما حصل الزلزال قام يجرى على تحت حافى وهو بيصرخ باعلى صوته زلزال زلزال وانا والله منزلتش للشارع خالص المهم بهلول فضل يلف حوالين الشارع زى الساقيه ويصرخ ...الزلزال خلص من بدرى وهو شغال عماله يلف ..الناس فى الشارع نسيوا خوفهم ونسيوا الزلزال وفضلوا يضحكوا ويتغمزوا على بهلول ..انا بصراحه اتكسفت جدا ووشى احمر وناديت عليه وهو مش سامعنى وعماله يلف ...ناديت على اخويا الصغير من جوه وقلت له تعرف توقفه الواد زى ما يكون لقيها فرصه فى ثوانى كان فى الشارع وحط رجله فى طريق بهلول لقيته بيتكعور على الارض زى لعيبه الكوره بصراحه كنس الشارع وانا ساعتها صرخت عليه وحطيت ايدى على وشى لغايه لما قام وحمدت ربنا انه طلع سليم ..وقعد كذا سنه مش عارف مين اللى شنكله لغايه لمل اخويا قال له
المهم ارجع تانى للسنه اللى فاتت جه يصرخ ويقول بهلوله انا اتنفضت من على السرير وقلت له خير فى ايه؟؟؟؟؟؟؟
قال لى طالعين مصيف 3 1يام
بصراحه انا فرحت ونسيت الخضه وقلت له بجد؟؟
قالى حذرى رايحين فين ؟؟؟
قلت له شرم الشيخ طيب الغردقه ..اللاسكندريه..بورسعيد ..السويس...مرسى مطروح ..الاسماعيليه..دهب كل ده وهو يقول لى لا ..دخلت على سواحل ليبيا والسودان وتشاد وجزر القمر وهو يضحك ويقول لا وفى الاخر يقولى رايحين العزبه
قلت له عزبه ايه ماتخلى الطابق مستور ماحنا عارفين بعض
قال لى واحد زميلى عازمنا عنده فى العزبه 3 ايام وقعد يغنى ويرقص ويقول اما هتبقى حته فسحه يا بهلوله هنركب خيل وهنصطاد بط ووز وعصافير ويمام وها نجرى حوالين القصر بتاع العزبه
وفى الليل خرج بهلول ورغم بخله الشديد جدا اشترى بندقيه صيد وملابس جوكى خيل وطاسه من اللى بيلبسوها فى راسهم والعجيب انه اشترى 15 عصايه من اللى بيمسكوها الفرسان فى ايديهم فى افلام زمان ليه 15 واحده مش عارفه
المهم سافرنا وكانت العزبه فى القليوبيه صحانا بدرى يادوب صلينا الفجر ومشينا وعلى العنوان سألنا لغايه لما وصلنا وشفنا بيوت العزبه من بعيد قال لى وعلى وجهه علامات النصر العزبه هناك اهيه ....واول ما دخلنا العزبه فضل يزمر بالكلاكس كانه فى فرح لغايه لما خرج واحد والظاهر انه صحى على صوت الكلاكس كان غضبان جدا وقال ايه فى ايه؟؟...بهلول خاف منه بس عمل نفسه جامد وسأله فين سيدك محمد؟؟؟؟ الراجل بص له وكان هايكله قاله محمد مين وزفت مين اللى سيدى على الصبح ....رد بهلول بصوت واطى محمد عبدالهادى الراجل مسك الباب وحط ايده على الازاز بكل عصبيه وقاله احترامك انك فى بلدنا وانك ضيف ومعاك حريم بيت محمد عبد الهادى اخر بيت هناك شايفه ؟؟؟؟ بهلول مردش سكت من الخوف الراجل قال وانت راجع مش عايز اسمع صوت العربيه خالص فاهم؟؟؟؟؟
برضه بهلول مشى من غير حتى ما يكح
المهم وصلنا البيت وكان بيت ريفى ضيق وحر جدا وفيه ناموس وحشرات جدا جدا وتعبت واتخنقت 3 ايام مصيف
ملحوظه الاستاذ محمد وزوجته كانوا ناس فى غايه الادب والزوق والاحترام وكانت امنيه مراته تروح المصيف

Wednesday, July 4, 2007

الخنصره مقبوله ولا مرفوضه

سعيده اخواتى المدونات واخوانى المدونين

ليدس فرست

حد منكم يعرف معنى كلمه خنصره

اللى عارف اكيد معظمهم ستات لان كلمه خنصره كلمه ستاتيه ديمقراطيه متحده معناها ان الواحده تروح مثلا تشترى عبايه تسأل البائع عن سعرها يقولها مثلا ب 120 جنيه تفاصل معاه لما تطلع روحه وتاخدها ب 100 جنيه وتضرب ال20جنيه فى الامانات وتقول لجوزها جبتها ب 120 جنيه .......هذا هو معنى الخنصره وقيسوا على كده كل حاجه
طبعا بعض الاصدقاء هيستنكروا الحكايه دى واكيد معظمهم من الرجاله وانا مكنتش اعرف حاجه عن الخنصره ولكن معامله بهلول وبخله الشديد علمونى كتير قوى
انا عايزه اقولكم انى بقالى 13 سنه متجوزه المحروس بهلول ....وبهلول طيب قوى لدرجه المعيله اه لدرجه المعيله تتصوروا انه بيلعب مع اولاد اخته بلى .كل ما تيجى اخته عندنا يقعد معاها عشر دقايق ويقوم يجيب كيس البلى بتاعه صدقونى معاه كيس بلى ويقعد يلعب مع العيال ....واحد عنده 10 سنيين والتانى 8 سنيين ........ومره دبوا خناقه مع بعض على البلى هو يقول النيكل ده بتاعى وابن اخته يقوله لاياخالى انت سرقه من الكيس بتاعى وصوتهم على جرينا انا واخته وخلصنا الموضوع وقلناله عيب يا بهلول انت كبير وده عيل اديله النيكل بتاعه وفعلا عطاه النيكل وحلف مايلعب معاهم تانى واول ما جم مره تانيه نسى كل حاجه وقعد يلعب معاهم
المهم بهلول رغم طيبته الا انه بخيل قوى قوى قوى والجنيه بيطلع منه بطلوع الروح رغم انه بيكسب ومعاه فلوس على قلبه بالهبل لكن علشان يدينى فلوس اجيب شنطه ولا جزمه ولا عبايه ولا اى حاجه انا محتجاها لازم نتخانق ويسمع صوتنا الناس علشان كده بطلت اطلب منه اى حاجه واتبعت له نظام الخنصره وبكده بجيب اللى انا عايزاه
اه نسيت اقولكم انا بشتغل فى مصلحه حكوميه وبيفضلى من القبض 150جنيه بعد المواصلات والفطار والشاى الشهاده لله بهلول مبيشفهمش ومبيخدش منى ولا جنيه ولاقرش منهم انا عامله جمعيه مع زميلى فى الشغل ب 3000 جنيه لمده 20 شهر قبضتها وغيرتها كذا مره وكل مره كان بهلول بيخدها منى مره عايز يعمل عمره للعربيه مره مزنوق وكان مستلف فلوس مره ولدته بتعمل عمليه افتكر انى عمرى ما اخدت الجمعيه ولا مره لنفسى
يبقى من حقه يجبلى اللى انا عايزاه لكن هتقول لمين
المهم يا جماعه انهارده بعد ما جينا من الشغل انا باجى قبله عملت الاكل وتمام التمام وهو جه واكلنا وبعد الاكل لقيته عماله ينفخ ويفش بصوت عالى ويقول اف طبعا انا صدرلتله الطرشه وعملت نفسى مش واخده بالى وهو عماله ينفخ لغايه لما بطنه وصدره يبقوا قد الفيل وبعدين يفش لغايه لما يبقى عامل زى البرص الجعان
المهم لما لقانى مطنشه قام قالى بهلوله بهلوله قلت له نعم قال انا دخلت مدونتك امبارح باليل
قلت له اسمع احنا متفقين محدش يزعل من كلام حد
قال لا انا لقيت مدونتك مليانه صور وانا معنديش ولا صوره
قلت له طيب ما تنزل صور براحتك
حط وشه فى الارض وقالى مبعرفش...انا لقيتها فرصه اخبط منه عشره ولا عشرين جنيه قلت له الحاجات دى ليها كابل مخصوص وده غالى ومش اى حد يعرف ينزلها
قالى طيب مانتى منزله كذا صوره
قلت له لا دى واحده زميلتى فى الشغل بتنزل الصوره ب 50 جنيه قام قعد يتنطط ويزعق ويقول انا عارفك طول عمرك نصابه ليه انتى فاكرانى ايه مختوم على قفايا مش عايز صور ولا نيله ولاعايز مدونات من اصله
سكت انا وقلت لنفسى ليه يا بهلوله طيرتى الفلوس من ايدكى
وقعدت الوم نفسى
وفجاءه لقيته بيقولى بهلوله بهلوله قلت له نعم
قالى انا هدفع فى الصوره 30 جنيه بس
طنشت
قعد يتحايل عليا نص ساعه لغايه لما وافقت قلت له عايز كام صوره قالى 5 وهادفع 150 جنيه
قلت له هات الفلوس وانا هاتصل على صاحبتى واديها الباسورد وتنزل اللى احنا عايزينه
فرح بهلول وعطانى ال 150 جنيه وانتم فاهمين طبعا!!!!!!!!!!!!!!!!!!!!!!!!!.كل حاجه

Monday, July 2, 2007

صباحه كرشه

البيه خرج دلوقتى بعد الماتش بتاع الاهلى والزمالك وشد الستاره الحمرا اللى على الشباك بتاع المنور وخرج مع العيال اللى ماشيين يقولوا اهلى اهلى .....خليه انشاءالله يجى الفجر زى كل ماتش وبكره ينام فى البيت وبلاها شغل.ماهو اصله مصاحبلى واحد لاسع زيه فى الدور الرابع كل ماتش يكسبوه يخرجوا مع العيال فى الشارع
بس كله كوم واللى حصل يوم ما مصر فازت بكاس اقريقيا كوم ..اول ما خلص الماتش لقينا جرس الباب عمالا يضرب فتح الباب وقعدوا يخدوا بعض بالحضن ويتنططوا وكان صاحبه جايب معاه دف بهلول غلبان دماغه على قده دخل المطبخ وجاب حله وجرى وانا انادى عليه وهو يابو فكيك على تحت
الفجر لقيته جاى من غير الحله وهدومه متبهدله ولابس فرده جزمه واحده
اول ما دخل كنت مستنياه وعينى بطق شرار شفت منظره قعدت اضحك عليه ربع ساعه وقلت له طيب جايب ليه الفرده بتاعت الجزمه هتستنسخها وتطلع فرده تانى وحتى لو استنسختها دى شمال واللى هتستنسخها هتطلع شمال برضه
كل ده وانا عماله اتكلم معاه واضحك عليه وهو ولا هو هنا غير هدومه واترمى على السرير وحتى مقليش تصبحى على خير وانا بصراحه كان صعبان عليا قوى قوى ...لامش بهلول اللى صعبان عليا ...كان صعبان عليا الحله
علشان كده اتعودت لو فيه ماتش اخبى الحلل واخليله الطاسه بتاعت القليه حتى لو خدها يرحمنى من نضافتها ...لكن من ساعه ما عورته فى تمن الحله وخدت منه قد تمنها تلات مرات وهو بيخاف يدخل المطبخ
المهم المره دى برضه هعوره فى تمن الستاره ولا معنديش حق

Sunday, July 1, 2007

اعرفكم بنفسى

اولا يسعد صباحكم اخواتى المدونات واخوانى المدونين
وده بحكم ليدس فرست او السيدات اولا
اعرفكم بنفسى انا بهلوله طبعا الاسم ده ناس كتير هتضحك عليه لكن ما باليد حيله
اول تدوينه لى فى المدونه دى ولكن انا عندى مدونه تانيه بهلول جوزى ميعرفش عنها حاجه
حصلت النهارده خناقه بينى وبين بهلول كانت هتوصل للمأذون لكن ولله الحمد الوقت كان متأخر
احكى لكم الحكايه من الاول
انا بهلوله موظفه حكومه مطحونه فى الشغل والبيت والمواصلات ومن تحكم سى السيد بهلول اللى فاكرنى جاريه من جواريه روحى يا بهلوله هاتى يا بهلوله عيز اشرب يابهلوله عايز اكل ...المهم عايشلى فى دور هارون الرشيدى
سمعت عن المدونات قلت اعملى مدونه اطلع فيها كل اللى جوايا ...وفعلا عملت مدونه وكنت كل يوم اروح من الشغل قبل بهلول ب 3 ساعات اعمل الاكل بسرعه وانظف البيت على السريع واضربلى ساعه او ساعه الا ربع يوميا على النت اتجول فى المدونات واكتب فى مدونتى...المهم بهلول كان بيتسحب كل يوم ويروح الاوضه التانيه ويقعد على الكمبيوتر بالساعه والساعتين وانا سايباه لغايه لما سمعت فى يوم صوت كتابه على لوحه المفاتيح لانه كان ناسى يقفل الباب زى عادته
بصراحه الفار لعب فى عبي يكونش بهلول بيشيت اكيد دخل الشات ..ربنا يسامحنى مشيت على صوابع رجلى لحد باب الاوضه ووقفت لقيته بيكتب بوست على البلوجر امت راجعه ومشيت عادى ودخلت عليه ..ولان بهلول غلبان ومعندهوش خباسه مقفلش الجهاز مع ان فى زرار فى المشترك انا كنت باستعمله لما الاقيه جه من الشغل وانا على الكمبيوتر
المهم.لقيته ساب الجهاز واللتفت لى ووسع عنيه وكبر مناخيره معرفش ازاى وقالى بصوت عالى بهلوله ايه اللى صحاكى دلوقتى ؟؟ قلتله هو ممنوع اصحى الا فى ميعاد ولا ايه ؟؟ قالى لا براحتك بس انا عامل عليكى عندك شغل الصبح ..قلتله طيب مانت عندك شغل زيى زيك ...قالى بس انا نمت بالنهار .قلتله من الاخر انت بتدون قالى وانتى تعرفى منين التدوين قلت بصراحه وعلى المكشوف انا عندى مدونه ...قالى ازاى هو انا طرطور فى البيت ياست هانم ولا ايه..قلتله بهلول اشمعنى انت عندك مدونه قال انا راجل قلت ودى كمان فيها راجل من ست قاللى لا ست ولا بت يا مدام الكمبيوتر بكره هيتباع ولا انا ولا انتى وقام دايس على الزرار وقفله وخد فى وشه وعلى السرير طوالى ..رحت انام لقيته نايم فى اخر بلاد السرير امت انا واخده الطرف التانى ونمت
شويه ولقيته بينادى بهلوله انتى نمتى ؟ بصراحه طنشت وعملت نفسى مش من هنا قام منادى تانى بهلوله بهلوله بهلوله قلت له نعم قالى عندى حل نعمل مدونه احنا الاتنين قلت له ازاى قالى مدونه نكتب فيها اللى عايزينه قلت له مينفعش نعمل اسم واحد ومدونتين برقم سرى واحد قاللى موافق وقمنا نعمل المدونه واصر ان يكتبها باسم بهلول ولكنى قلت له فين حقوق المراه الللا كنت مؤمن بيها قاللى خلاص موافق بس بشرط كل واحد يكتب بمزاجه ومحدش يزعل من حد وواقفت وحبيت اقوللكم علشان احكى لكم براحتى على مشاكلى معاه هو والشغل والمواصلات