Wednesday, July 4, 2007

الخنصره مقبوله ولا مرفوضه

سعيده اخواتى المدونات واخوانى المدونين

ليدس فرست

حد منكم يعرف معنى كلمه خنصره

اللى عارف اكيد معظمهم ستات لان كلمه خنصره كلمه ستاتيه ديمقراطيه متحده معناها ان الواحده تروح مثلا تشترى عبايه تسأل البائع عن سعرها يقولها مثلا ب 120 جنيه تفاصل معاه لما تطلع روحه وتاخدها ب 100 جنيه وتضرب ال20جنيه فى الامانات وتقول لجوزها جبتها ب 120 جنيه .......هذا هو معنى الخنصره وقيسوا على كده كل حاجه
طبعا بعض الاصدقاء هيستنكروا الحكايه دى واكيد معظمهم من الرجاله وانا مكنتش اعرف حاجه عن الخنصره ولكن معامله بهلول وبخله الشديد علمونى كتير قوى
انا عايزه اقولكم انى بقالى 13 سنه متجوزه المحروس بهلول ....وبهلول طيب قوى لدرجه المعيله اه لدرجه المعيله تتصوروا انه بيلعب مع اولاد اخته بلى .كل ما تيجى اخته عندنا يقعد معاها عشر دقايق ويقوم يجيب كيس البلى بتاعه صدقونى معاه كيس بلى ويقعد يلعب مع العيال ....واحد عنده 10 سنيين والتانى 8 سنيين ........ومره دبوا خناقه مع بعض على البلى هو يقول النيكل ده بتاعى وابن اخته يقوله لاياخالى انت سرقه من الكيس بتاعى وصوتهم على جرينا انا واخته وخلصنا الموضوع وقلناله عيب يا بهلول انت كبير وده عيل اديله النيكل بتاعه وفعلا عطاه النيكل وحلف مايلعب معاهم تانى واول ما جم مره تانيه نسى كل حاجه وقعد يلعب معاهم
المهم بهلول رغم طيبته الا انه بخيل قوى قوى قوى والجنيه بيطلع منه بطلوع الروح رغم انه بيكسب ومعاه فلوس على قلبه بالهبل لكن علشان يدينى فلوس اجيب شنطه ولا جزمه ولا عبايه ولا اى حاجه انا محتجاها لازم نتخانق ويسمع صوتنا الناس علشان كده بطلت اطلب منه اى حاجه واتبعت له نظام الخنصره وبكده بجيب اللى انا عايزاه
اه نسيت اقولكم انا بشتغل فى مصلحه حكوميه وبيفضلى من القبض 150جنيه بعد المواصلات والفطار والشاى الشهاده لله بهلول مبيشفهمش ومبيخدش منى ولا جنيه ولاقرش منهم انا عامله جمعيه مع زميلى فى الشغل ب 3000 جنيه لمده 20 شهر قبضتها وغيرتها كذا مره وكل مره كان بهلول بيخدها منى مره عايز يعمل عمره للعربيه مره مزنوق وكان مستلف فلوس مره ولدته بتعمل عمليه افتكر انى عمرى ما اخدت الجمعيه ولا مره لنفسى
يبقى من حقه يجبلى اللى انا عايزاه لكن هتقول لمين
المهم يا جماعه انهارده بعد ما جينا من الشغل انا باجى قبله عملت الاكل وتمام التمام وهو جه واكلنا وبعد الاكل لقيته عماله ينفخ ويفش بصوت عالى ويقول اف طبعا انا صدرلتله الطرشه وعملت نفسى مش واخده بالى وهو عماله ينفخ لغايه لما بطنه وصدره يبقوا قد الفيل وبعدين يفش لغايه لما يبقى عامل زى البرص الجعان
المهم لما لقانى مطنشه قام قالى بهلوله بهلوله قلت له نعم قال انا دخلت مدونتك امبارح باليل
قلت له اسمع احنا متفقين محدش يزعل من كلام حد
قال لا انا لقيت مدونتك مليانه صور وانا معنديش ولا صوره
قلت له طيب ما تنزل صور براحتك
حط وشه فى الارض وقالى مبعرفش...انا لقيتها فرصه اخبط منه عشره ولا عشرين جنيه قلت له الحاجات دى ليها كابل مخصوص وده غالى ومش اى حد يعرف ينزلها
قالى طيب مانتى منزله كذا صوره
قلت له لا دى واحده زميلتى فى الشغل بتنزل الصوره ب 50 جنيه قام قعد يتنطط ويزعق ويقول انا عارفك طول عمرك نصابه ليه انتى فاكرانى ايه مختوم على قفايا مش عايز صور ولا نيله ولاعايز مدونات من اصله
سكت انا وقلت لنفسى ليه يا بهلوله طيرتى الفلوس من ايدكى
وقعدت الوم نفسى
وفجاءه لقيته بيقولى بهلوله بهلوله قلت له نعم
قالى انا هدفع فى الصوره 30 جنيه بس
طنشت
قعد يتحايل عليا نص ساعه لغايه لما وافقت قلت له عايز كام صوره قالى 5 وهادفع 150 جنيه
قلت له هات الفلوس وانا هاتصل على صاحبتى واديها الباسورد وتنزل اللى احنا عايزينه
فرح بهلول وعطانى ال 150 جنيه وانتم فاهمين طبعا!!!!!!!!!!!!!!!!!!!!!!!!!.كل حاجه

12 comments:

ftataljanna said...

طيب دلوقتى اقول له

مش عيب كده يا بهلولة

يا اختى اتق الله

بس هاقول لك نشوف بهلول بقى الاول بخيل بحقيقي ولا انتى اللى استغلالية

بس هاقول لك اوعى الموضوع ده يطلع زى موضوع الحلة ساعتها هايكون فيها زعل ولا هاااااااااا

على فكرة كان ممكن اوى من موضوع الصور ده تاخدى عنده بنط جدعنه بالحكاية دى واهو تبقى حاجة حلوة كده دلعاية بينكوا يعني وساعتها كنتى تقولى له مش انا نزلت لك الصور عالمدونة

ياللا انتوا عسل اصلا ربنا يخليكوا لبعض

علاء said...

مبروك المدونة
و ربنا يخلي البهاليل الصغيرين
و يجوزوا و يجيبولك بهاليل كتييييييييييير

ftataljanna said...

بهلولة اختى العزيزة

الراجل طلع ابن حلال اهو بيساعدك فى شغل البيت

وكارمك اخر كرم اهو خدى بالك منه بقى

اما عن حكاية الخنصرة فخدى بالك لو زوجك بخيل فعلا وده واضح انه مش موجود يقال ان هند بنت عتبه زوجة ابى سفيان بعد فتح مكة اجيز لها من رسول الله صلى الله عليه وسلم انها تاخد من مال زوجها ما يكفيها بس خدي بالك ما يكفيها يعني الحاجات الضرورية مش خنصرة وده على اساس ان زوجها ده كان بخيل جلدة يعني

استوصي بزوجك خيرا واعلمى انه جنتك ونارك

عارفه

الزوجة المسلمة مطلوب منها ايه طاعة زوجها يعنى تكون زوجه باره بزوجها وتؤدى الخمس فروض عارفه لو عملتى كده وطبعا الصيام وكده يعنى تفتح لك ابواب الجنة يوم القيامة وتدخلى من ايها شئتى

بس اصلحى واحسني والمراة فى الاسلام مش مطلوب منها فضل عبادة يعني ولا صلاة زيادة ولا قيام ولا سيام بس ادى الفريضة واحسني لزوجك هاتدخلى الجنة شفتى الحكاية سهلة ازاى

بس مش سهله اوى

احسني واحتسبي الاجر عند الله

عصفور المدينة said...

سنضرب بيد من حديد على كل من تسول له نفسه الخنصرة
وحرية البلي مكفولة لكل مواطن

عصفور المدينة said...

نسيت اقول لك اقري تعليق فتاة الجنة كويس أهي برضة واحدة زيك أحسن تقولي تعصب رجالي

بهلوله said...

فتاه الجنه
ازيك يا احلى فتيات الجنه
وجودك هنا مشعللها نور
مش عارفه حبيتك اوى كده ليه
ومع انى اكبر منك هاسمع كلامك
وتحياتى ياعسوله

بهلوله said...

علاء
وجودك هنا شرف كبير يا هندسه
والله يبارك فيك

بهلوله said...

فتاه الجنه
قمر 14
لاتقلقى على بهلوله من ناحيه العبادات
وجزاكى الله عنى وعن من يرى تعليقك وكلماتك خير كثير
وخلى بالك انا هاضيفك عندى انتى وعلاء وعصفور والعازف اللى لسه مجاش يظهر الموصلات عنده زحمه

بهلوله said...

عصفور الجنه
مابلاش الحديد يا احلى عصفور واضرب باى حاجه تكون اسفنج
وحريه البلى مكفوله لكل مواطن؟؟
طيب يا عصفر نبقى نعمل ساحات شعبيه للعب البلى مسافات طويله ..وبلى الحواجز وبلى 50 متر حره
ملحوظه:كلمه عصفر ليس بها اخطاء املائيه ولكنى باخد على الناس الكويسين بسرعه

بهلوله said...

عصفور الجنه
اطلع من دول يا عصفر انا برضه هاقول عليك متعصب للرجاله لاياراجل بهلوله ميطلعش منها كده انا ارحب بالراى الاخر واسمح لشعبى ان ينتقدنى وقتما يشاء

ftataljanna said...

اما عن مشعللها نور فالبيت منور باصحابه طبعا

واما عن اضافتى فدى حاجة اكيد تسعدنى

واما عن انك حبيتينى فصدقينى بجد الشعور متبادل سبحان الله

بهلوله said...

فتاه الجنه
وحشانى ياقمر