Monday, July 23, 2007

خروف العيد

مساء الخير يا احلى بشر

تتصوروا اول خناقه بينى وبين بهلول بعد العمليه بسبب ايه

مش هتصدقونى

بسبب خروف العيد

امبارح بعد العصر رن الانتركم رديت لقيت البواب بيسأل عن بهلول علشان واحد جاى له زياره قلت له خليه يطلع ودخلت جوه المطبخ اجهز الساقع وسيبت بهلول يستنى الضيف شويه وجالى بهلول وقالى تعالى يا بهلوله سلمى على الضيف مفسش حد غريب ده استاذ محمد صاحبى بتاع القليوبيه

خرجت وفى ايدى واجب الضيافه ودخلت الصالون وسلمت على الضيف لكن وانا داخله لمحت بعينى اربع سبايت (جمع سبت)فلاحى قلت فى سرى يا دين النبى الله اكبر ياحلاوه يا ولاد ايه ده كل دى زياره قعدت اضايف الراجل وعينى على الزياره عماله اقول لنفسى قب يا بت يا بهلوله اكيد سبت مليان زبده وجبنه وسبت مليان وز وبط وفراخ وحمام وسبت مليان مانجه وفواكه وسبت مليان فطير مشلتت والذى منه ...اشطه بالهبل يا بهلوله زياره عشر نجوم

وطبعا لان الراجل جاى من مشوار يهد الحيل جهزت لقمه خفيفه المهم اتسترت والحمد لله

الراجل قعد للمغرب وانا نفسى ومنى عينى اعرف ايه اللى فى السبت

المهم بعد المغرب استاذن وتوكل على الله وبهلول وصله لعربيته اسفل العماره

وانا انفردت بالفريسه اللى بقالى ساعات وانا بخمن دى ايه

اول سبت فتحته طلع دره شامى

تانى سبت طلع دره شامى

تالت سبت طلع دره شامى

رابع سبت برضه دره شامى

انا بصراحه اندهشت ايه ده هو الراجل فاكرنا بديول ولا ايه ؟؟؟؟؟

ولا يمكن بهلول هيتاجر فى العلف؟؟؟؟؟؟؟؟

المهم جه المحروس بسلامته بهلول باشا...واول ما دخل قالى

طبعا فتشتى فى الحاجه يا بهلوله؟

ايه ده يا بهلول؟

ده علف انا طلبته من محمد صاحبى علشان الخروف

خروف ايه؟

خروف العيد يا بهلوله

قلت له وانا حاسه ان العمليه هتنفجر

العيد فاضل عليه 5 شهور واحنا متعودين نجيب الخروف يوم الواقفه هياكل كل ده فى يوم

قالى وهو بيضحك براحه على نفسك يا بهلوله انتى لسه تعبانه انا هاقولك على كل حاجه.......من كام يوم بنحكى انا ومحمد عن اللحمه وخروف العيد قالى انا باجيب الخروف قبل العيدب 7 او 8 شهور واعلفه للعيد يبقى ميه ميه قلت له خلاص هاتلى كام شوال دره وكام شوال فول علشان لحم الخروف يبقى احمر وكام شوال عيش وانا هاشترى خروف صغير واعلفه انا بطريقتى والشقه هنا واسعه وممكن نفضى له اوده

صوت فى وشه وقلت له وانا بصرخ زى المجنونه

خروف فى الشقه يا بهلول حرام عليك انت جاى من انه كوكب......انت هتعمل الشقه زريبه 5 شهور

حرام عليك

حرام عليك

حرام عليك

حرام عليك

يا جماعه حد يقوله حاجه قبل ما اجيب الاكياس البلاستيك

16 comments:

MQabbani said...

اكيد عم تمزحي,
لأنه خروف بالشقة يعني

ريحة قاتلة ,
حشرات طائرة
ازعاج على 24 ساعة
اصوات غريبة من كتر الحركة
لا سمح الله امراض
بعدين دا بيعملها بأي مكان و على الواقف , مش يروح الحمام يعني

و فوق كل هاد الخاروف اذا ما شم هوا و غير جو يمكن تفيئو تلاقي ميت (نافق )يعني

وغير هيك الخارف بدو متابعة , و يمكن ياخد برد و يرشح وانا ما بمزح و بضل يعطس طول الليل كمان غير انه كل ما ينفتح الباب بدو يطلع

انا لما اشتغل بالخرفان بالعيد اعد معهم ساعة زمن و قرف عيشتي من الريحة و الأصوات

يعني بنفس البيت !! اكيد اكيد عم تمزحي يعني لو على السطح اهون بلا , بس بالبيت
اكيد بهلول بمزح

بهلوله said...

الاخ قبانى
والله
والله
والله
ده سبب الخناقه فعلا وانا لا امزح ولا حاجه
اه نسيت اقولك
مرحب بك
وفى حاجه تانيه انت لم توجه اى عتاب ولا غيره لبهلول
كام كلمه كده ولا كام بونيه شمال على يمين علشان يرجع عن اللى فى دماغه

عصفور المدينة said...

ما هو انت كدة كدة حتجيبي الأكياس عشان الخروف
يتربى في عزك

أمــانــى said...

هههههههههههههههههههههههه
هههههههههههههههههههههههه
ههههههههههههههههههههه
خلاص انتى ممكن تخليه يجيب الخروف قبل العيد بخمس ايام علشان يلحق باكل العلف بس يا خسارة خلى بالك احسن السوس يدخل فيه
هههههههههههههههههههههه
خلى بالك من بلهول يا بنتى ده عملة صعبه اليومين دول حافظى عليه ادينى قولتك وماله لما تقوليله على عينا وراسى الخروف هو حتة خروف كتكوت ولا بيعمل صوت ولا رايحة ولا اى حاجة
ههههههههههههههه
ربنا يخليكوا لبعض يااااااااااااارب آمـــــــــين ويسعدكم يااااااااارب آمـــــــــــــين

سكتم بكتم said...

هههههههههههه
خلي بالك هي بتبدأبخروف

وبعدين وأنتوا قاعدين في قاعدة صفا حيقولك عايزين نخاويه بقا ويجيب واحد تاني

وبعدين المعيز مكاسبها 200 المية

وأية رأيك في جاموستين نكمل بيهم الطقم

أقولك مفيش غير الأكياس البلاستك
البلاستك هو الحل خلي ده شعارك

بس فية مشكلة صغننه عارفة أية
لو لسه بتحبيه

مدونة عسل متهيألي حبقي زائر دائم بعد أذنك
تحياتي

ftataljanna said...

بهلولتى العزيزة

خبر ابيض ابيض ايه اللى جرى

ايه ده يا بهلووووووول حرام عليك
خروف فى الشقه

وريحه بقى و ماماة طول اليوم

يا عينى

ومين اللى هاينضف له الاوضه ويحط الاكل وممكن يتنطح بعد الشر وياخد كام غرزة

يا عينى

وبعدين بالعقل كده يا بهلول بزمتك

الاوضة اللى هاتفضوها دى ايا كانت الحاجات اللى فيها هاتودوها فين

وبعدين بعد ما تدبحوا الخروف الاوضه دي صدقونى ماحدش هايطيق يقعد فيها وساعتها بقى يا جميل هاتضطر تغير الدهان وتنضف الاوضه وجايز جدا تغير البلاط

بزمتك كده احسن

ولا تبيع العلف وتخلص

:)

تبيع العلف ها
:)

شاب نفسه يحقق حلمه said...

ههههههههههههه
خروف العيد
اياكي توافقي انه يبقي في الشقه ده ازعاج مزمن
طول اليل والنهار مش هتعرفي تستريحي بعد العمليه
وبعدين شيبك من الخروف دلوقتي
ازيك دلوقتي عامله ايه يارب تكوني بخير كده انا شاء الله

حسن ارابيسك said...

بهلولة
واللهي أنا مع بهلول في مجايبه للخروف
بس يكون فوق السطوح عشان يكون بيتمشى ساعة الضُهرية يقوم ياخد له ضربة شمس تُقصف عمره
أو بيشرله كباية شاي ساعة المغربية وهو بيتمشى فوق السطوح وبيتأمل السما يقوم مايخدش باله ودلق من فوق السطوح يتقصف عمره

لاكن انا مش عارف ازاي بهلول حاسبها
بالعكس دي هاتبقى معاه بخسارة لان ياست إحسبي عندك
اولاً انتى عاوزه تحافظى على نظافة الشقة ومش عاوزاه يعمل بيبي على الارض في الشقة يبقى كده انتي مضطره تغرمي حوالي سته شهور في مجايب بمبرز عشان البيبي ده غير وجع دماغك وانتي بتغيريله البمبرز في اليوم عمال على بطال يعني عيشه تقرف
يعني خدي عندك وانتي قاعده بتتفرجي على برنامج للأزياء وهو سي خروف بيه عاوز يشوف ماتش كوره على قناة تانيه اووووه قلبت بخناقة
خدي مثلا انتم تاكله كل حاجه وهو يعني هايقتنع بالدرة والفول ابداً هايبصلك في الأكل ويقول وانا مالي أعمليلي النهارده الأكله الفلانية وعلى العشا مش عارف ايه وعلى الفطار مدرك ايه ده غير وانتي قاعده مع لهلول افندي تتفرجوا مثلا على التيفزيون عاوزين تقولوا كلمة كده كلمه كده بصه غزل مسكة ايد ازاي وهو قاعد لكم بعني بالعربي بهلول افندي جاب لحضرتك دره في البيت يالهوووويييي عاللي هايجرالك يابهلوله ياغلبانه ياللي ليه طالعه من المستشفى ومربعنتيش
لكن من ناحيه تانيه عشان اكون حقاني ومنصف مع الإيام انتي والخروف هاتخدوا على بعض وصدقيني هايبقى ونس ليكي في البيت وبهلول مش موجود ده غير انه هايعملك عزوه في البيت وفي المنطقة
لكن الخوف كل الخوف انه يجي العيد الكبير وبعدين نسمع اللي اندبح مش الخروف ويكون للأسف بهلول أفندي وساعتها النيابه هاتحقق ياترى دي غلطه جزار عشان نظره ضعيف ولا دي وزت شيطان من حضرتك....
ومازال التحقيق مستمر

بهلوله said...

عصفور المدينه
يتربى فى عزى
ماشى ياعم عصفور
انا كنت حاطه عليك امل كبير انك تعقله
متشكره يا باشا

بهلوله said...

امانى
فعلا عنك حق بهلول عمله صعبه جدا جدا جدا جدا
ومش هتلاقى منه اليومين دول
انقرضت سلالته مع الانقراض القاسى للديناصورات فى الزمن المتوحش

بهلوله said...

سكتم بكتم
يعنى انت شايف كده
استعنا على الشقى بالله
يا ويلك يا ظلام ليلك يا بهلول يا ابن ام بهلول
انا ارحب بك زائرا كريما

بهلوله said...

فتاه الجنه
شفتى بهلول اللى كنتى بتدافعى عليه
وتقوليلى حرام يا بهلوله
بهلول كويس يا بهلوله
عايز يجبلى خروف فى الشقه
اعمل ايه يا اخواتى
هو حل السكينه والاكياس مفيش غيره

بهلوله said...

شاب نفسه يحقق حلمه
دلوقتى الحمد لله
ساعه ما كنت طالعه من العمليه كنت احسن من كده
ربنا يجازى اللى كان السبب

بهلوله said...

حسن ارابيسك
والنبى يا ارابيسك يا خويا
متعرفش الجزار الاحول ده يدبح الخروف اللى بالى بالك
واقعد اتشكرلك لغايه اول الشهر الجديد

mohand said...

السلام عليكم
ما هو عنده حق يا بهلوله
تكليف انه يعلف الخروف
ارخص من تكاليف انه يشتريه
غير كده هيكون ضامنه
معلش يعني
ومتقوليش بدافع علشان راجل زيه
:D:D:D:
بس برضه يشوف السطح او بلكونه المطبخ يحطه فيها
بلاش البلكونه علشان الفضايح
بس شوفي السطح علشان متقرفيش منه
بس خافوا من حرامية الخرفان
تحياتي

بهلوله said...

mohand
حراميه الخرفان ايه
انا عاوزه حراميه بنى ادمين يخلصونى من بهلول
انتى عارف لو جاب الخروف وحته فى اى حته خارج الشقه انا مش هتكلم
لكن انا مش قادره اتصوره جوه الشقه
ولا مش معايا
شكرا لزيارتك يا مهند