Saturday, July 7, 2007


عندما قمت انا وبهلول بعمل مدونه بهلوله ومدونه بهلول لم نكن نتوقع حدوث مشاكل بيننا ...الا ان هناك بوادر مشاكل وغضب من ناحيه بهلول
وبعد جلسه عائليه استمرت اكثر من 7 دقائق شرحت لبهلول ان المدونتين ربما تساعدانا فى حل مشاكلنا ونقوم بعمل تواصل بيننا وبين اصدقائنا كما انها من الممكن ان توعى الناس عن بعض المشاكل الزوجيه وان كان فى محيط ضيوفنا فقط
فتفهم بهلول الامر ووعد الا يغضب وترك لى حريه كتابه ما احب ..........
واليوم سوف احكى لكم عن تدخل البعض فيما لا يفهمه
منذ حوالى 7 أو 8 سنين جاءنى بهلول وانا فى المطبخ بعمل الاكل وهو بينادى من الصاله زى عادته بهلووووله بهلووووووله
خير يا بهلول فى ايه
- امسكى الخشب الاول
-اهو يا عم بهلول خير عامل هليله ليه
-انا نويت اعمل مشروع هيكسب دهب
بصراحه يا جماعه انا حطيت ايدى على قلبى مانا عارفه بهلول ومشاريعه المبهلله يعمل المشروع ويخسر ويرجع يعيط زى العيال الصغيره
- خير يا بهلول مشروع ايه المره دى
- مشروع بلاى استشن
- دنتا اللى معاك كلهم 130 الف جنيه والمشروع ده عايز ملايين
- ملايين ايه يا بهلوله دول كلهم 10 الاف جنيه
- هو انت هتعمل مصنع ب 10 الاف جنيه
- هههههه ضحكتينى يا بهلوله مصنع ايه انا هاعمل دكان العاب بلاى استشن للاطفال
ساعتها انا كنت عايزه اكل الراجل ده باسنانى وقلت له وانا متغاظه
- دكان ايه شغل العيال الصغيره ده اعقل يا بهلول انت عندك 33 سنه (دلوقتى 41 سنه) عيب عليك وبعدين انت مش محتاجله المشروع ده
- هو انا هالعب معاهم انا هأجر الدكان واجيب 3 اجهزه بلاى استيشن و3 اجهزه تليفزيون والواد محمد ابن خلف بتاع الكشك هيقف فيه ويجيب لى الايراد كل يوم من غير ما اتحرك من مكانى كل يوم على اقله 100 جنيه صافى يعنى 3 شهور والم حقى وابداء فى المحصول يا بهلولتى
يا بهلول اعقل يا بهلول كانى مانى راسه والف سيف لازم يعمل المشروع ...سبته على راحته وعلى راى المثل اللى معاه فلوس بتحيره يجيب حمام ويطيره
المهم يا جماعه عمل بهلول المشروع اللى فرج علينا العماره وامه لا اله الا الله العيال تتخانق فى الدكان يطلعوا ينادوا بهلول يصلحهم على بعض ..الابهات بتوع العيال يجوه يشتكوا ويزعقوا ان ده سرقه لفلوس عيلهم ...عيل ينادى من تحت يا عم بهلول محمد خد الفلوس منى ومش راضى يلعبنى ومحمد يقول ده لعب اكتر من نص ساعه وخد زياده عن حقه ...وكل يوم الواد محمد يقول له اشترينا انهارده دراع ومره مومرى ومره اسطوانات ومره عيل كسر كرسى لغايه لما فى يوم دخلت لقيت بهلول بيكلم نفسه فى المرايا ويقول انا اللى جبته لنفسى
-وانت مزعل نفسك ليه يا بهلول شيل ده من ده يرتاح ده عن ده
- عندك حق يا بهلوله انا غلطان بلاى استشن ايه وزفت ايه انا ها بيعه ولو بخساره
وفعلا خسر بهلول 4 الاف جنيه بعد ما باع الاجهزه وقعد زى عادته يعيط زى العيال الصغيره على الفلوس ويخبط راسه فى الحيط ويقول ده غلتطى انا اللى ما سمعتش كلام واحد زميلى قالى بلاش البلاى ستيشن وافتح دكان تاجير عجل بيكسب بلاوى
سبته ومشيت ما هو بهلول هيفضل بهلول

15 comments:

عصفور المدينة said...

بالشفا إن شاء الله
بس أعتقد مشروع المدونة ده راس ماله صغير
سكة 150 جنيه بس
:)

ftataljanna said...

السلام عليكم ورحمة الله وبركاته

بهلولتى حبيبتى ازيك

كويس انكوا اتناقشتوا فاتحة خير ياللا وللسعادة بقية

واما عن المشاؤيع وكده فوالله اللى ماتفهمش فيه مالكش فيه بس

والتجارة شطارة يعني عايزة حد كده مش سهل فاهمه

فقولى لبهلول يشوف له مستشار بيفهم ويسيبه من اصحابه

ربنا يسعدكوا يارب ويهنيكوا يا قمر

بهلوله said...

عصفور المدينه
انت مش عاوز تنسالى حكايه الصور ام 150 جنيه

بهلوله said...

فتاه الجنه
دنا لو قلت له على حكايه المستشار دى يجيب منشار ويطير رقبتى علشان ميدفعش ولا مليم احمر للمستشار
اشكرك على نشر اسمى فى البوست الجديد لكى
وياله اهه بهلول خد له نصيب هو التانى
يكش يتمر فيه

MQabbani said...

عجبني طريقة تعبيرك وكتابتك :)

و منكم نستفيد في المستقبل في مثل عنا بالشام بألو

قاضي الأولاد شنق حالو

مشان هيك يفضل تجنب اي مشاريع دخلها من أولاد :)

تحياتي و مدنة جميلة سررت بالتعرف عيها :)

الكلام نوعان :كلام فارغ وكلام مليان كلام فارغ said...

عارفه قوليلوا ان احسن حاجه بتكسب دلوقتى هي السنترالات بتكسب دهب
وربنا معاكي وتكملى معاه على خير من غير الكرسي ابو عجل
تحياتى

semsem said...

هههههههههههه
يعيش ويا خد غيرها

وتعيش وتفتكريلو يا بهلوله

ابوزياد الفاتح said...

هههههههههههههههههه
حلوه بهلول وبهلوله دى
ربنا يكرمك والله
مدونه اكثر من رائعه والموضعات حلوه جدا
شرفينى بالزياره

بهلوله said...

MQabbani
اهلا بك وبكل اهل الشام
وكما قلت قاضى الاولاد شنق حاله احسن تعبير على موقف بهلول

بهلوله said...

الكلام نوعان :كلام فارغ وكلام مليان كلام فارغ

لو بهلول قراء كلماتك يبقى هيدخل عالم السنترال
منوره المدونه

بهلوله said...

semsem
اشكرك جدا يا سمسم
واتمنى تكرار زيارتك

بهلوله said...

ابوزياد الفاتح

شكرا على الزياره
وانا فى طريقى لزياره مدونتك

kasperb4 said...

السلام عليكم

يعني حضرتك قولتيلي خليك هنا عشان عندنا شغل كتير

قلت ماشي هاخليني هنا

بس عايز اعرف الشغل خلص ولا لسة عشان اخرج بأه لحسن ريحتي قربت تطلع

إنـســانـة said...

هههههههههههههه

يالهوى ده عنده داء المشاريع زى بابا اللى مجننى انا واخواتى وماما ههههههههههههه

يلا ربنا يوفقكم ياااااااارب

المدونة زى السكر على فكرة
:)

سلام

ياسر سليم said...

ينهار ابيض

ربنا يعينك على بهلول ده

انصحية يفتح سايبر بدل البلاى استيشن والعجل

وعلى الأقل يبقى متابع المدونة اول بأول

ربنا يهديهولك