سعيده يا اجمل واحلى بشر
شوفتوا بهلول عمل ايه ؟؟؟
كتب تدوينه عن ذهابى للدجالين والشيخه محسن علشان كتر الزعل بينا والخصام المستمر
وانا قبل ما يكمل بقيه الحكايه اعترف وبكل امانه اننى ارتكبت اكبر غلطه فى حياتى بالذهاب للناس دول واعترف اننى لم اكن غلطانه وبس لا قولوا على بهلوله اى صفه وانا اتحملها
هبله عبيطه جربانه حفيده ام سحلول انا موافقه ومعترفه بغلطتى
وانا عارفه ان بهلول مش راح يسكت
دا فى مواضيع كتير فى الحكايه لو انهف فى عقله وحكاها هتزعلوا جدا منى ولكن انا بقول لكم من الان يا جماعه انا غلطت واتحملت نتيجه غلطى من راس الافعى ..قصدى من راس الحكمه.. بهلول افندى ومن زميلاتى فى العمل ومن اختى ومن اخويا ومن ناس كتير ...لما الجاموسه بتقع سكاكينها بتكتر ..وفعلا خرمولى كل حته فى جسمى بالكلام المعتق المنقوع فى ميه المش ..
انا ندمت على اللى حصل منى
واحب ان اعرفكم
ان الجنرال المتقاعد حفيد ام قويق بهلول التاسع والتسعين بعد المائه التاسعه ..سليل عائله محمد بكر الكبير (مين محمد بكر الكبير) خليها فى سركم
المهم ان بهلول بجلاله قدره بعد ما كتب التدوينه دى وحس ان انا اتضايقت جه يساومنى انى ابطل كتابه عن هيافاته ونوادره العياليه فى مقابل الا يكمل بقيه الاحداث
انا رفضت لانى لا اقبل المساومه فى اى شىء وقلت له انا عارفه ان اصدقائى هيزعلوا منى لكن ده ماضى وانتهى وانا عرفت غلطتى وخلصت الحكايه
انا عارفه ان الاحداث اللى هيحكيها المعلم بهلول صعبه عليكم ولكن ما يطمئننى انها حدثت فى الماضى
كلمه اخيره
كلمه مهمه
كلمه خطيره
استحمل بقى يا ابو البهاليل اللى هيحصل لك من بهلولتك
18 comments:
لا بجد اوعي تكوني عملتي كدة وعلى كل
الندم توبة
ويتوب الله على من تاب حتى تطلع الشمس من مغربها
ايه يا بهلولة , و ده برضو كلام ؟؟
المهم طمنيني مشي الحال و تحسنت الأمور ؟
هو انتى رحتى بجد ولا ايه
الموضوع خطير
وبعدين هدوا اللعب شوية
رمضان كريم
عزيزتي بهلوله اول مره اجي هنا مش عارفه امسك نفسي من الضحك بجد زي العسل خلاص قلبي هايوقف من كتر الضحك
ههههه انا قراءت كل المدونه تحفه
ربنا يزيدك من خفه الدم
اما بالنسبه لموضوع الدجال عفا الله عما سلف و الله تواب رحيم معلش الواحد مش بيتعلم بالسهل
بس و نبي خف شويه علي بهلول علي راي استاذ طائر رمضان كريم
ولا يهمك يا بهلولة
صحيح غلطتي غلط كبير جدا
معصية وكبيرة من الكبائر
لكن مش انت ادركت انك ارتكبتي ذنب
وندمتي
واستغفرتي
خلاص
الله غفور رحيم
وانا بصراحة معجبة جدا جدا
بموقفك مع بهلول
وعدم قبولك مبدا المساومة
وعلى نفسها جنت براكش
والبادي اظلم
انا باهدي النفوس بس
لا حقيقي يا بهلولة
المهم تكوني استغفرتي ربنا
وندمتي اوي
والناس هايزعلوا منك ليه
مفيش انسان معصوم من الخطأ
خلقنا ضعاف لنخطئ
ونستغفر
ويغفر لنا المولى عزوجل
انت كدا بقى كسبتي بنط
على بهلول
وخليتي مفاجاته زي عدمها
استراتيجية ممتازة
سلام يا بهلولة
لا ااااا دأنتوا مقطعين هدوم بعض خالص
بقولك أية الصلح خير
أو علي الأقل أعملوا تهدئة زي الفلسطينيين
مش تباركيلى يا ست بهلولهههههههه
دلوقتى باكتب التعليقات باسمى مش باسمك انتى
ابكى يا بهلوله بكاء التماسيح مانا عارفك اكتر من اى مخلوق
فاكره ساعه ما كنت واقع على ضهرى
كنت اول ما تتدخلى عندى هاتك يا عياط
واول ما تخرجى
ولا اى حاجه حاصله
لغايه لما كشفتك
يا ام قويق
عصفور المدينة
فعلا استاذنا عصفور ده حصل
لكن انت عارف ايه السبب ؟
السبب ان احنا على طول فى مشاكل وخلافات على اى سبب ومن غير سبب
لغايه لما واحده لعبت بدماغى على موضوع الشيخه محسن ده
واكدت لى ان فى ناس عمله لنا عمل ودفعت فلوس كتير وانضحك على
لكن الموضوع ده عمره ما هيتكرر تانى ابدا
MQabbani
اخ محمد
لا ما مشى الحال
الحاله من سيىء للاسوء
الطائر الحزين
الله اكرم
فعلا ده حصل
والف شكر على اهتمامك
دنــــيــــــا مـحـيـرنـي
يا اختى الف مليون مراحب بيكى
وعلى رايك رمضان كريم
لكن بهلول لو مسكتش مش هفوتهاله
ما علينا
لسانك بينقط سكر
وكلامك عشره على عشره
لكن انا برضه هفرجك على بهلول
وحركاته العيالى
سكتم بكتم
لو عملنا زى الفلسطنيين
يبقى انا حماس وهو فتح
بهلول
انا ام قويق
بالذمه مش مكسوف على دمك تقدر تقولهالى فى وشى
خليك جدع واعملها
انا بتحداك
معلش يا جماعة بيحصل بين الحبايب اكتر من كدا وبيرجعوا احسن من الاول
وقدر الله وماشاء فعل يا بهلولة ، استغفري ربنا سبحانه وتعالى ..والموضوع بتاع المشاكل والخناقات عمره ما بيتحل كدا
:)
اه كنتى ريحه عشان تعملى ورقه محبه ياسلام يا ولاد بس هى فين الشيوخ الى بتفهم
اوعى تعملى كده تانى
تحياتى
نور
استغفر الله العظيم من كل الذنوب
كل ما احاول احل مشاكلنا يزودها بهلول
ضد الظلم
توبه انا فعلا توبت
وعمرى ما هكررها تانى
Post a Comment