Thursday, September 6, 2007

مشاعر بهلوليه

سعيده يا احلى بشر
المشاعر والحياه
انا عندى 34 سنه يمكن يزيدوا هبابه او يقله هبابه ولكن خلينا نقول 34 سنه
بهلولى
او
زوجى الاستاذ بهلول عدى الاربعين ب3 سنين
مشاغل الحياه بتخبط فينا زى الخبط فى الحلل بالظبط
زمان ايام الخطوبه
كان بهلول لازق عندنا زى لزقه الغراء تماما
كان بيجى من شغله على بيتنا ياكل ويشرب ويقعد معانا لغايه العشاء يتعشى ويروح بيتهم
كل يوم على دى الحال
بس علشان الظلم حرام
الا يوم الجمعه
كان بيجى من الصبح ونروح انا وهو نصلى الجمعه
ويرجع يتغدى ويستنى العشاء
لغايه ما الحاجه والدتى كانت بتعمل حسابه فى اللحمه والفراخ وكل حاجه كأنه مكتوب معانا على البطاقه
وكان فى الرايحه والجايه يقعد يتغزل فيا
ويقول كلام معسول
وهو لخمه فى الكلام لكن ما علينا اهو كان بيطلع مشاعره
السؤال
المهم
جدا
فين المشاعر دى ؟؟؟
ليه لما الزوجين يمر عليهم قرن من الزمن زى انا وبهلول يبقى كل كلامهم عن المصاريف والاكل والشرب وفلانه قالت وعلانه سوت ؟؟
مره بضحك انا وبهلول وقلت له ما تيجى نرجع ايام الخطوبه
تتصوروا قالى ايه ؟
بص لى من فوق لتحت بكل بلاهه وقالى
ومين هيدفع لى ال200 جنيه اللى دفعتهم للمأذون ؟؟؟
ياااااااااااااااااااااااااااااااه
هل ده تفكير الرجاله بعد الزواج ؟؟؟
ولا احنا يا ستات مزودنها شويه ؟؟؟؟
كفايه علينا مشاعر الحب فى الخطوبه
يمكن هننهب
على العموم اخوانى المدونين واخواتى المدونات
تعرفوا
وارجوا ان تصدقوا
ده كان حوار لى مع بعض السيدات يحملن نفس المشكله بابعاد مختلفه ولكن فى النهايه تتلاقى الاراء
كانت كل سيده تحكى بحرقه عن اهمال زوجها لها
واتفقت الاخوات النسووات معى على ان فتره الخطوبه لن تعوض

54 comments:

ما علينا said...

بهلولتي حبيبتي

ما فكرتوش ان السادة الرجال لديهم نفس التساؤل
ما هو اكيد برضوا حضراتكم
السيدات المتزوجات
لسه زي ما كنتم ايام الخطوبة
اكيد لا

هاتقولي الحياة والمسئولية والمشاكل والمصاريف

الحاجات دي عليكم انتم الاتنين
مش انت لوحدك

على الست وعلى الراجل
لو قدرتي تكوني انت زي ما كنتي ايام الخطوبة

ساعتها حاسبيه على كلام الغزل والرقة
والعواطف


يا بهلولة يا حبيبتي خلي الرجالة ساكتة

الكلام دا هايخليهم يبعبعوا


باموت فيك يا جميل

ما علينا said...

ما ارضيتش احتفل باني التعليق الاول
الا لما اتاكد
لان كان ممكن يكون
حد بيكتب معايا في نفس الوقت
وينشر تعليقه قبلي

لكن كدا خلاص
اهني نفسي باني اول تعليق عند
بهلولتي حبيبتي

عصفور المدينة said...

ربنا يهديكي
انت عايزة تعملي ثورة
الفلوس والاهتمامات المشتركة برضه من ضمن
المشاعر

خليك واقعية تخيلي كدة أيام الانتخابات وبعدين بعدها
يعني مثلا التأييد مثلا للرئيس المرشح وبعد كدة الوزارة تجتمع هل بقى كل ما الوزارة تجتمع يقعدوا يقولوا بالروح بالدم نفديك ياسيادة الريس ولا يقعدوا بقى يشوفوا المصايب اللي هم فيها

ما قلتليش إيه حكاية سعيدة دي

يلا السلام عليكم

عصفور المدينة said...

أنا كنت باكتب في نفس الوقت

حواء said...

انا بقى ماشفش لا خطوبة ولا غيره كله كان فى يوم واحد بعد قراية الفاتحة بكام شهر عشان كدة يا روحى مش هقدر اقول لك عن ايام الخطوبة لكن ممكن احكى عن ايم الهباب قصدى الجواز وليالى العذاب .. ياللة ماعلينا .. سلام ياقمر

حياة الأحلام said...

بهلوله

حقيقى أنا أول مره أدخل على بلوجك بس جميل فعلا
والبوست حلو بيحكى واقع أنا دايما أقول لصحابى ليه فعلا الناس اللى متجوزه بتنسى الحب وكل حاجه وسط المشاغل

أنا لسه ما جربتش ولا خطوبه ولا جواز بس متفائله خير أن شاء الله

ونفسى بجد أعيش حياة أحلامى وأتحدى الواقع المرير ده

بس أنتى بأيديكى قبل ما تطلبى من بهلول أبدئى بنفسك والراجل بجد طفل صغير يعنى أكيد لو لقى منك حب الخطوبه مش هيتردد أنه برضه يحبك بنفس الطريقه..لان فى الاغلب الست هى اللى بتعرف تمشى حياتها على حاجه معينه او طريقه معينه

تحياتى وتمنياتى بحياة سعيده جدا

الطائر الحزين said...

لحد دلوقتى مقلتيش سعيدة ليه

اذا رجعتم انتم مثل ايام الخطوبة سيرجع الرجال لها غصب عنهم

الرجل يرى الفعل وستجدية يرد الفعل ازاى بقى معرفش انتى ونصيبك

وسلمى لى على المظهر وريحة الحلل والاطباق والعيال

عازف الناى said...

انا لسه جاى من عند بهلول
وبينفى كل كلامك ده
بهلوله
لو الست اهتمت بنفسها شويه اكيد الراجل هيهتم بيها
ولازم مع زحمه الحياه والعيال
يكون فى بند اسمه الزوج
شويه حنان ولو على الهامش
وصدق المثل
قدم السبت تلاقى الحد قدامك

بهلول said...

يا عينى عليكى يا بهلوله
يا غلبانه
عموما انا رديت عليكى عندى
سلام
مون امور

حسن ارابيسك said...

انا مرة شفت مسرحيةاسمها القمطة
اللي بتربطها الست في البيت وهي بتطبخ وهي بتغسل وهي بتمسح

وكان الموضوع عن ليه الست بعد الجواز بتتغير تفاصيلها بعد الجواز ولا يرى الزوج الصورة الجميلة التي كانت دائما أمام عيناه قبل الجواز


مرة زمان صاحب لينا متزوج واحنا قاعدين معاه كلنا عذاب قالنا ياجماعة اللي عاوز يشوف وش خطيبته على حقيقتها يروح طابب على بيت خطيبته الصبح بدري جدا ويفاجأها في غرفة النوم ويشوفها وهي صاحية والوش اللي هايشوفه ده هو الوش اللي هايفضل يشوفه طول عمره

فكرتيني بقصة لحمد رجب كانت اتعملت فيلم لزوجين اتفقوا يرجعوا ايام الخطوبة
كان هو يكلمها من التليفون من غرفة تانية وهي قاعده في غرفة تانية وكانوا يبعتوا لبعض جوابات غرام
وكان يمشي وراها يعاكسها في الشارع لحد ما جه مرة والناس اتلمت عليه وهات ياضرب على قلة أدبه ومعاكسة بنات الناس ولما الناس عرفوا انه زوجها قالوا عليهم مجانين

محمد عبد الرحمن said...

أنا بقى رحت عند بهلول عشان أسمع للجميع قبل ما أصدر الحكم النهائى

حكمت المحكمة بما هو آت
يحكم على السيد بهلول وحرمه السيدة بهلولة بإقتطاع وقت متكرر بشكل أسبوعى يخرجان فيه بمفردهما إذا أمكن أو لم يمكن وعلى السيد بهلول أن ينقى كلامه من مفردات الدبش والحجارة الكلامية ويرجع تانى للأحلام الوردية ويفرض عليه فرضادخول موقع إلإسلام أون لاين ويقرأ موضوع أين يذهب الحب بعد الزواج وتشمل هذه العقوبة السيدة حرمه
أما السيدة بهلولة فيلزمها وجوبيا خلال الوقت المستقطع أن تمتنع عن أى كلام عن المصاريف والجيران ودول قالو ودول عملوا وعن العيال وعن البخت المايل وفى حالة النسيان يتوجب الإعتذار ومحو الأثر بكلمات رقيقة من نوع ربنا يخليك لنا وإحنا من غيرك ولا حاجة ويشترك فى العقوبة السيد بهلول
هذه الأحكام مشمولة بالنفاذ وتنشر فى مدونة السيدة بهلولة لأنها اللى أشتكت ويرسل نسخا منها لكل الشاكيات الباكيات


ربنا يسعدكم جميعا ويخليكوا لبعض
ياجماعة شجعونى مش كدة ده أنا ناوى أتجوز خلو عندى أمل فى إنى مش هتندم على الحرية والعزوبية

http://kasperb4.blogspot.com/ said...

والله وحشتوني اوي قلت اجي أسأل طالما انتو مش بتسألو

:)

الله يخليكي يا مدام بهلولة ادعيلي انتي واستاذ بهلول بجد

وربنا يجمعنا في جنته ودار مقامته أمين

عصفور المدينة said...

كل عام وأنتم بخير

أمــانــى said...

كــل رمضان وانتى بخير وربنا يبغلك رمضـان
ويجعلك نافعة للامة ياااااااااارب آمــــــــــين
ويبغلك رمضــان ياااااااااارب آمــــــــــين

عازف الناى said...

كل عام وانتم بخير

بهلوله said...

ما علينا
يا حبيبتى الست مننا زى العيله الصغيره
تفرح من اقل كلمه
بس يقولوها
كل سنه وانتى طيبه

بهلوله said...

ما علينا
انا اللى من حقى احتفل ان القمر منورنى فى اول تعليق

بهلوله said...

عصفور المدينة
استاذنا الغالى
بس انا بتكلم على بطاقه التموين يا عصفور مش بطاقه الانتخابات
ولا استنى
ما يمكن عندك حق
وبالروح بالدم نفديك يا مأذون
اما عن حكايه سعيده
اتمنى انى اكون سعيده وتعم السعاده على جميع من حولى

بهلوله said...

عصفور المدينة
تعليقك تاج ودائما فى المقدمه

بهلوله said...

bocycat
لو هباب وانا عندى هباب
يبقى هنصمد المدونه
ايه رايك نتكلم مع بعض على الاميل

بهلوله said...

حياه الأحلام
اشكرك جدا على الزياره
واتمنى لكى تجربه ناجحه
لكن ابعدى عن البهاليل

بهلوله said...

الطائر الحزين
لا قلت سعيده ليه
بس وخرى شويه
ريحه الاطباق والحلل
كويس جدا
انت طبعا انحاذت لابن جنسك بهلول
وبعدين احنا يا نسوان ريحتنا فله
بس اتشطروا واشتروا البارفان
سعيده جدا بزيارتك
وكل عام وانتم بخير

بهلوله said...

عازف الناى
هو هجوم من الرجاله
انا عارفه
عازف الناى والطائر الحزين
ماشى كلامك على عينى وعلى راسى

بهلوله said...

بهلول
مون ايه
والله زمان يا بهلل

بهلوله said...

حسن ارابيسك
اه كانت اسعاد يونس
وحسين الشربينى
هو فيه احسن من كده يا ابو على

بهلوله said...

طال الليل
من فحص قانون المدونات فرع التعليق والاشادات
ومرجعه كل البيانات قررنا ماهو ات
اولا الموافقه على كل ما قاله طال الليل
ثانيا قبول عزومه طال الليل فى فرحه
وانتظار الهبر

بهلوله said...

آلام وآمال
انساك ده كلام انساك يا سلام
انت اللى وحشنا اكثر
وانا فى تتابع مستمر معك
كل عام وانتم بخير

بهلوله said...

عصفور المدينة
كل عام وانتم بخير
والف صحه وسلامه

بهلوله said...

أمــانــى
كل عام وانتم بخير

بهلوله said...

عازف الناى
كل عام وانتم بخير

حسن ارابيسك said...

كل سنة وانتي وبهلول طيبين
أعاده الله عليكم بالخير واليمن والبركات
وحوي يا وحوي ايوحا
مستني بوست منكم على فوانيس رمضان والخناقة اللي قامت عليها
العصفورة قالتلي وصوتكم جايب اخر الشارع
وحوي ياوحوي

عصفور بلا أجنحة said...

جيت بس اقول كل سنة وانتى طيب

الكلام نوعان :كلام فارغ وكلام مليان كلام فارغ said...

ياسلام لو فتره الخطوبه تدوم لحد الجواز
يعنى يبقى المتجوزين يبقوا حاسين انهم مخطوبين
ويمروا باحاسيس اللهقه والشوق
ياسيدي
انا بحلم صح
يلا بقى
تحياتى
رمضان كريم

بهلول said...

كل عام وانتم والامه الاسلاميه بخير

حياة الأحلام said...

السلام عليكم


كل سنه والكل بخير ورمضان كريم وربنا يتقبل منا ومنكم صالح الأعمال ويارب الى الله أقرب

تحياتى

حواء said...

كل سنة اونتى طيبة يا قمر وبهلول طيب .. رمضان كريم

ما علينا said...

كل سنة واحلى بهلولة طيبة
كل سنة وانت وبهلول طيبين دايما وسعداء
كل سنة وانت وجميع المسلمين الى الرحمن اقرب

والى طاعته اقرب

ياسر مدني ...دينامو الإخوان said...

بفكركم بفوازير رمضان
عباره عن خلق وصحابي
ولوحد مجاوبشي وفي أسئله فاتته ممكن يحلها في أي وقت بشرط كل فزوره يوميه إجابتها متتأخرشي عن عشر أيام

وخلو بالكو الفوز للأسبقيه في الحل

بهلوله said...

حسن ارابيسك
كل سنه وانت طيب يا ابو على
لا
العصفوره بتاعتك شيش بيش
عايزه نظاره
لسه ما قامتش اى خناقه لحد دلوقتى
امسك الخشب
يمكن دى نفحات رمضان
وحوى يا وحوى

بهلوله said...

عصفور بلا أجنحة
جيت تشرف وتأنس
وكل سنه وحضرتك بالف سلامه

بهلوله said...

الكلام نوعان :كلام فارغ وكلام مليان كلام فارغ

لو كان كلامك يحصل
كنت اقعد بهلول مع البواب ويزورنى كل يوم شويه ويمشى
اما افكر
ولا
بلاش
احنا فى رمضان حرام اخليه ينام على السلم
كل سنه وانتى طيبه يا قمر

بهلوله said...

بهلول
ايه التقدم ده
كل سنه وانت طيب يا بهلول
يا اجمل بهلول
يا احلى بهلول

بهلوله said...

حياه الأحلام
وعليكم السلام ورحمه الله وبركاته
كل سنه وانتى طيبه يا قمر

بهلوله said...

bocycat
وانتى طيبه يا احلى بوسى كات

بهلوله said...

ما علينا
حبيتى ونور عينى
كل سنه وانتى طيبه يا روح بهلوله

بهلوله said...

ياسر مدني ...دينامو الإخوان
اروح اتابع يمكن اكسب
وكل سنه وانت طيب
يا سى دينامو

http://kasperb4.blogspot.com/ said...

مدام بهلولة الاول كل سنة وانتي طيبة
ثانيا انا المرة اللي فاتت مقريتش البوست عشان حالتي النفساوية كانت مش ولا بد
المرادي قريتو وقبل ما ارد بصراحة روحت قريت بوست الاستاذ بهلول
وبما اني عرفت ابعاد الحكاية من كلا الطرفين
قررنا نحن الفقير الى عفو ربه صاحب مدونة آلام وآمال
أن أعلن تحيزي التام لاستاذ بهلول بصراحة
الراجل معاه حق ف كل كلمة


:: للعلم ::
انا بهدي النفوس بس يا جماعة محدش يفهم غلط

:D

حواء said...

كل سنة وانتى طيبة وبهلول طيب يا قمر تعرفى انا كمان حاسة انى اعرفك من 200 سنة بجد ياريت نبقى نتكلم .. سلام

حواء said...

انا اخدت اميل الياهو هو انت مش عندك اميل عالهوت ان شاء الله نتكلم قريب

ftataljanna said...

وحشتيني يا بهلولة

كل سنة وانتى طيبة

معلش اعذؤيني الظروف ضاؤبة خالص مؤخرا بجد

الموضوع ده بقى كل الستات ليهم نفس الراي

ياخوفى يا بدران من الجواز واللى مستخبي فيه

بهلوله said...

آلام وآمال
اهم حاجه حالتك النفسيه عامله ايه دلوقتى
ابعد اى مشاكل عن دماغك وسيبها لله
وبما انك قد حذرت بهلول
فانا ممنونه جدا
بس انت قلت انه على حق
ماشى
انا احترم رأيك جدا
وتحياتى لك

بهلوله said...

bocycat
يشرفنى جدا الحديث معكى

بهلوله said...

bocycat
انا عندى اميل الياهو
bbb11hhh11@yahoo.com
واتمنى التواصل والحديث معكى
بس انتى قوليلى ازاى
اختك بهلوله فى الكمبيوتر نص لبه

بهلوله said...

ftataljanna
شفتى المدونه نورت ازاى بوجودك
انا كنت زعلانه منكى
لكن دلوقتى صافى يا لبن
واهم حاجه انكى كويسه
وسلامى يا احلى فتاه الجنه