سعيده يا احلى بشر
المشاعر والحياه
انا عندى 34 سنه يمكن يزيدوا هبابه او يقله هبابه ولكن خلينا نقول 34 سنه
بهلولى
او
زوجى الاستاذ بهلول عدى الاربعين ب3 سنين
مشاغل الحياه بتخبط فينا زى الخبط فى الحلل بالظبط
زمان ايام الخطوبه
كان بهلول لازق عندنا زى لزقه الغراء تماما
كان بيجى من شغله على بيتنا ياكل ويشرب ويقعد معانا لغايه العشاء يتعشى ويروح بيتهم
كل يوم على دى الحال
بس علشان الظلم حرام
الا يوم الجمعه
كان بيجى من الصبح ونروح انا وهو نصلى الجمعه
ويرجع يتغدى ويستنى العشاء
لغايه ما الحاجه والدتى كانت بتعمل حسابه فى اللحمه والفراخ وكل حاجه كأنه مكتوب معانا على البطاقه
وكان فى الرايحه والجايه يقعد يتغزل فيا
ويقول كلام معسول
وهو لخمه فى الكلام لكن ما علينا اهو كان بيطلع مشاعره
السؤال
المهم
جدا
فين المشاعر دى ؟؟؟
ليه لما الزوجين يمر عليهم قرن من الزمن زى انا وبهلول يبقى كل كلامهم عن المصاريف والاكل والشرب وفلانه قالت وعلانه سوت ؟؟
مره بضحك انا وبهلول وقلت له ما تيجى نرجع ايام الخطوبه
تتصوروا قالى ايه ؟
بص لى من فوق لتحت بكل بلاهه وقالى
ومين هيدفع لى ال200 جنيه اللى دفعتهم للمأذون ؟؟؟
ياااااااااااااااااااااااااااااااه
هل ده تفكير الرجاله بعد الزواج ؟؟؟
ولا احنا يا ستات مزودنها شويه ؟؟؟؟
كفايه علينا مشاعر الحب فى الخطوبه
يمكن هننهب
على العموم اخوانى المدونين واخواتى المدونات
تعرفوا
وارجوا ان تصدقوا
ده كان حوار لى مع بعض السيدات يحملن نفس المشكله بابعاد مختلفه ولكن فى النهايه تتلاقى الاراء
كانت كل سيده تحكى بحرقه عن اهمال زوجها لها
واتفقت الاخوات النسووات معى على ان فتره الخطوبه لن تعوض
54 comments:
بهلولتي حبيبتي
ما فكرتوش ان السادة الرجال لديهم نفس التساؤل
ما هو اكيد برضوا حضراتكم
السيدات المتزوجات
لسه زي ما كنتم ايام الخطوبة
اكيد لا
هاتقولي الحياة والمسئولية والمشاكل والمصاريف
الحاجات دي عليكم انتم الاتنين
مش انت لوحدك
على الست وعلى الراجل
لو قدرتي تكوني انت زي ما كنتي ايام الخطوبة
ساعتها حاسبيه على كلام الغزل والرقة
والعواطف
يا بهلولة يا حبيبتي خلي الرجالة ساكتة
الكلام دا هايخليهم يبعبعوا
باموت فيك يا جميل
ما ارضيتش احتفل باني التعليق الاول
الا لما اتاكد
لان كان ممكن يكون
حد بيكتب معايا في نفس الوقت
وينشر تعليقه قبلي
لكن كدا خلاص
اهني نفسي باني اول تعليق عند
بهلولتي حبيبتي
ربنا يهديكي
انت عايزة تعملي ثورة
الفلوس والاهتمامات المشتركة برضه من ضمن
المشاعر
خليك واقعية تخيلي كدة أيام الانتخابات وبعدين بعدها
يعني مثلا التأييد مثلا للرئيس المرشح وبعد كدة الوزارة تجتمع هل بقى كل ما الوزارة تجتمع يقعدوا يقولوا بالروح بالدم نفديك ياسيادة الريس ولا يقعدوا بقى يشوفوا المصايب اللي هم فيها
ما قلتليش إيه حكاية سعيدة دي
يلا السلام عليكم
أنا كنت باكتب في نفس الوقت
انا بقى ماشفش لا خطوبة ولا غيره كله كان فى يوم واحد بعد قراية الفاتحة بكام شهر عشان كدة يا روحى مش هقدر اقول لك عن ايام الخطوبة لكن ممكن احكى عن ايم الهباب قصدى الجواز وليالى العذاب .. ياللة ماعلينا .. سلام ياقمر
بهلوله
حقيقى أنا أول مره أدخل على بلوجك بس جميل فعلا
والبوست حلو بيحكى واقع أنا دايما أقول لصحابى ليه فعلا الناس اللى متجوزه بتنسى الحب وكل حاجه وسط المشاغل
أنا لسه ما جربتش ولا خطوبه ولا جواز بس متفائله خير أن شاء الله
ونفسى بجد أعيش حياة أحلامى وأتحدى الواقع المرير ده
بس أنتى بأيديكى قبل ما تطلبى من بهلول أبدئى بنفسك والراجل بجد طفل صغير يعنى أكيد لو لقى منك حب الخطوبه مش هيتردد أنه برضه يحبك بنفس الطريقه..لان فى الاغلب الست هى اللى بتعرف تمشى حياتها على حاجه معينه او طريقه معينه
تحياتى وتمنياتى بحياة سعيده جدا
لحد دلوقتى مقلتيش سعيدة ليه
اذا رجعتم انتم مثل ايام الخطوبة سيرجع الرجال لها غصب عنهم
الرجل يرى الفعل وستجدية يرد الفعل ازاى بقى معرفش انتى ونصيبك
وسلمى لى على المظهر وريحة الحلل والاطباق والعيال
انا لسه جاى من عند بهلول
وبينفى كل كلامك ده
بهلوله
لو الست اهتمت بنفسها شويه اكيد الراجل هيهتم بيها
ولازم مع زحمه الحياه والعيال
يكون فى بند اسمه الزوج
شويه حنان ولو على الهامش
وصدق المثل
قدم السبت تلاقى الحد قدامك
يا عينى عليكى يا بهلوله
يا غلبانه
عموما انا رديت عليكى عندى
سلام
مون امور
انا مرة شفت مسرحيةاسمها القمطة
اللي بتربطها الست في البيت وهي بتطبخ وهي بتغسل وهي بتمسح
وكان الموضوع عن ليه الست بعد الجواز بتتغير تفاصيلها بعد الجواز ولا يرى الزوج الصورة الجميلة التي كانت دائما أمام عيناه قبل الجواز
مرة زمان صاحب لينا متزوج واحنا قاعدين معاه كلنا عذاب قالنا ياجماعة اللي عاوز يشوف وش خطيبته على حقيقتها يروح طابب على بيت خطيبته الصبح بدري جدا ويفاجأها في غرفة النوم ويشوفها وهي صاحية والوش اللي هايشوفه ده هو الوش اللي هايفضل يشوفه طول عمره
فكرتيني بقصة لحمد رجب كانت اتعملت فيلم لزوجين اتفقوا يرجعوا ايام الخطوبة
كان هو يكلمها من التليفون من غرفة تانية وهي قاعده في غرفة تانية وكانوا يبعتوا لبعض جوابات غرام
وكان يمشي وراها يعاكسها في الشارع لحد ما جه مرة والناس اتلمت عليه وهات ياضرب على قلة أدبه ومعاكسة بنات الناس ولما الناس عرفوا انه زوجها قالوا عليهم مجانين
أنا بقى رحت عند بهلول عشان أسمع للجميع قبل ما أصدر الحكم النهائى
حكمت المحكمة بما هو آت
يحكم على السيد بهلول وحرمه السيدة بهلولة بإقتطاع وقت متكرر بشكل أسبوعى يخرجان فيه بمفردهما إذا أمكن أو لم يمكن وعلى السيد بهلول أن ينقى كلامه من مفردات الدبش والحجارة الكلامية ويرجع تانى للأحلام الوردية ويفرض عليه فرضادخول موقع إلإسلام أون لاين ويقرأ موضوع أين يذهب الحب بعد الزواج وتشمل هذه العقوبة السيدة حرمه
أما السيدة بهلولة فيلزمها وجوبيا خلال الوقت المستقطع أن تمتنع عن أى كلام عن المصاريف والجيران ودول قالو ودول عملوا وعن العيال وعن البخت المايل وفى حالة النسيان يتوجب الإعتذار ومحو الأثر بكلمات رقيقة من نوع ربنا يخليك لنا وإحنا من غيرك ولا حاجة ويشترك فى العقوبة السيد بهلول
هذه الأحكام مشمولة بالنفاذ وتنشر فى مدونة السيدة بهلولة لأنها اللى أشتكت ويرسل نسخا منها لكل الشاكيات الباكيات
ربنا يسعدكم جميعا ويخليكوا لبعض
ياجماعة شجعونى مش كدة ده أنا ناوى أتجوز خلو عندى أمل فى إنى مش هتندم على الحرية والعزوبية
والله وحشتوني اوي قلت اجي أسأل طالما انتو مش بتسألو
:)
الله يخليكي يا مدام بهلولة ادعيلي انتي واستاذ بهلول بجد
وربنا يجمعنا في جنته ودار مقامته أمين
كل عام وأنتم بخير
كــل رمضان وانتى بخير وربنا يبغلك رمضـان
ويجعلك نافعة للامة ياااااااااارب آمــــــــــين
ويبغلك رمضــان ياااااااااارب آمــــــــــين
كل عام وانتم بخير
ما علينا
يا حبيبتى الست مننا زى العيله الصغيره
تفرح من اقل كلمه
بس يقولوها
كل سنه وانتى طيبه
ما علينا
انا اللى من حقى احتفل ان القمر منورنى فى اول تعليق
عصفور المدينة
استاذنا الغالى
بس انا بتكلم على بطاقه التموين يا عصفور مش بطاقه الانتخابات
ولا استنى
ما يمكن عندك حق
وبالروح بالدم نفديك يا مأذون
اما عن حكايه سعيده
اتمنى انى اكون سعيده وتعم السعاده على جميع من حولى
عصفور المدينة
تعليقك تاج ودائما فى المقدمه
bocycat
لو هباب وانا عندى هباب
يبقى هنصمد المدونه
ايه رايك نتكلم مع بعض على الاميل
حياه الأحلام
اشكرك جدا على الزياره
واتمنى لكى تجربه ناجحه
لكن ابعدى عن البهاليل
الطائر الحزين
لا قلت سعيده ليه
بس وخرى شويه
ريحه الاطباق والحلل
كويس جدا
انت طبعا انحاذت لابن جنسك بهلول
وبعدين احنا يا نسوان ريحتنا فله
بس اتشطروا واشتروا البارفان
سعيده جدا بزيارتك
وكل عام وانتم بخير
عازف الناى
هو هجوم من الرجاله
انا عارفه
عازف الناى والطائر الحزين
ماشى كلامك على عينى وعلى راسى
بهلول
مون ايه
والله زمان يا بهلل
حسن ارابيسك
اه كانت اسعاد يونس
وحسين الشربينى
هو فيه احسن من كده يا ابو على
طال الليل
من فحص قانون المدونات فرع التعليق والاشادات
ومرجعه كل البيانات قررنا ماهو ات
اولا الموافقه على كل ما قاله طال الليل
ثانيا قبول عزومه طال الليل فى فرحه
وانتظار الهبر
آلام وآمال
انساك ده كلام انساك يا سلام
انت اللى وحشنا اكثر
وانا فى تتابع مستمر معك
كل عام وانتم بخير
عصفور المدينة
كل عام وانتم بخير
والف صحه وسلامه
أمــانــى
كل عام وانتم بخير
عازف الناى
كل عام وانتم بخير
كل سنة وانتي وبهلول طيبين
أعاده الله عليكم بالخير واليمن والبركات
وحوي يا وحوي ايوحا
مستني بوست منكم على فوانيس رمضان والخناقة اللي قامت عليها
العصفورة قالتلي وصوتكم جايب اخر الشارع
وحوي ياوحوي
جيت بس اقول كل سنة وانتى طيب
ياسلام لو فتره الخطوبه تدوم لحد الجواز
يعنى يبقى المتجوزين يبقوا حاسين انهم مخطوبين
ويمروا باحاسيس اللهقه والشوق
ياسيدي
انا بحلم صح
يلا بقى
تحياتى
رمضان كريم
كل عام وانتم والامه الاسلاميه بخير
السلام عليكم
كل سنه والكل بخير ورمضان كريم وربنا يتقبل منا ومنكم صالح الأعمال ويارب الى الله أقرب
تحياتى
كل سنة اونتى طيبة يا قمر وبهلول طيب .. رمضان كريم
كل سنة واحلى بهلولة طيبة
كل سنة وانت وبهلول طيبين دايما وسعداء
كل سنة وانت وجميع المسلمين الى الرحمن اقرب
والى طاعته اقرب
بفكركم بفوازير رمضان
عباره عن خلق وصحابي
ولوحد مجاوبشي وفي أسئله فاتته ممكن يحلها في أي وقت بشرط كل فزوره يوميه إجابتها متتأخرشي عن عشر أيام
وخلو بالكو الفوز للأسبقيه في الحل
حسن ارابيسك
كل سنه وانت طيب يا ابو على
لا
العصفوره بتاعتك شيش بيش
عايزه نظاره
لسه ما قامتش اى خناقه لحد دلوقتى
امسك الخشب
يمكن دى نفحات رمضان
وحوى يا وحوى
عصفور بلا أجنحة
جيت تشرف وتأنس
وكل سنه وحضرتك بالف سلامه
الكلام نوعان :كلام فارغ وكلام مليان كلام فارغ
لو كان كلامك يحصل
كنت اقعد بهلول مع البواب ويزورنى كل يوم شويه ويمشى
اما افكر
ولا
بلاش
احنا فى رمضان حرام اخليه ينام على السلم
كل سنه وانتى طيبه يا قمر
بهلول
ايه التقدم ده
كل سنه وانت طيب يا بهلول
يا اجمل بهلول
يا احلى بهلول
حياه الأحلام
وعليكم السلام ورحمه الله وبركاته
كل سنه وانتى طيبه يا قمر
bocycat
وانتى طيبه يا احلى بوسى كات
ما علينا
حبيتى ونور عينى
كل سنه وانتى طيبه يا روح بهلوله
ياسر مدني ...دينامو الإخوان
اروح اتابع يمكن اكسب
وكل سنه وانت طيب
يا سى دينامو
مدام بهلولة الاول كل سنة وانتي طيبة
ثانيا انا المرة اللي فاتت مقريتش البوست عشان حالتي النفساوية كانت مش ولا بد
المرادي قريتو وقبل ما ارد بصراحة روحت قريت بوست الاستاذ بهلول
وبما اني عرفت ابعاد الحكاية من كلا الطرفين
قررنا نحن الفقير الى عفو ربه صاحب مدونة آلام وآمال
أن أعلن تحيزي التام لاستاذ بهلول بصراحة
الراجل معاه حق ف كل كلمة
:: للعلم ::
انا بهدي النفوس بس يا جماعة محدش يفهم غلط
:D
كل سنة وانتى طيبة وبهلول طيب يا قمر تعرفى انا كمان حاسة انى اعرفك من 200 سنة بجد ياريت نبقى نتكلم .. سلام
انا اخدت اميل الياهو هو انت مش عندك اميل عالهوت ان شاء الله نتكلم قريب
وحشتيني يا بهلولة
كل سنة وانتى طيبة
معلش اعذؤيني الظروف ضاؤبة خالص مؤخرا بجد
الموضوع ده بقى كل الستات ليهم نفس الراي
ياخوفى يا بدران من الجواز واللى مستخبي فيه
آلام وآمال
اهم حاجه حالتك النفسيه عامله ايه دلوقتى
ابعد اى مشاكل عن دماغك وسيبها لله
وبما انك قد حذرت بهلول
فانا ممنونه جدا
بس انت قلت انه على حق
ماشى
انا احترم رأيك جدا
وتحياتى لك
bocycat
يشرفنى جدا الحديث معكى
bocycat
انا عندى اميل الياهو
bbb11hhh11@yahoo.com
واتمنى التواصل والحديث معكى
بس انتى قوليلى ازاى
اختك بهلوله فى الكمبيوتر نص لبه
ftataljanna
شفتى المدونه نورت ازاى بوجودك
انا كنت زعلانه منكى
لكن دلوقتى صافى يا لبن
واهم حاجه انكى كويسه
وسلامى يا احلى فتاه الجنه
Post a Comment