Thursday, July 5, 2007

مصيف 9 نجوم


سعيده ياحلى بشر
اختكم بهلوله النهارده متواصله معاكم كام س
اعه علشان بهلول راح مع صحابه يتفسح وسابنى هنا فى البيت وحتى مقليش ولو عزومه مراكبيه تعالى معانا رغم ان فيه ناس واخده ستاتهم وعيلهم معاهم ورغم كمان ان انا لمحت له انى عايزه اخرج اشم هواء عمل نفسه مش سامعنى امت ساكته
المهم يا جماعه الفسحه دى فكرتنى بنادره من نوادر بهلول وما ادراك ما نوادر بهلول اكيد كان جده الكبير جحا ...مش هاضيع وقتكم راح احكيلكم على اللى حصل
من حوالى سنه وبالتحديد فى شهر 8 اللى فات جيت من الشغل بدرى وعملت اللى ورايا من شغل البيت والاكل ونمت شويه محستش الا بصوت بهلول وهو بينادى بصوت عالى جدا جدا رغم انه كان واقف جنب السرير قمت من النوم مفزوعه على صراخه بهلووووووله بهلوووووله بهلوووووله انا قلت الدنيا خربت وافتكرت اللى حصل منه يوم الزلزال سنه 92 كنا لسه مخطوبين وكان لازق عندنا زى الوطواط كل يوم كل يوم مش فاكره انه اخد يوم واحد اجازه المهم وقت الزلزال على ما اتذكر كان العصر المهم انه برضه كان عندنا زى عوايده اول ما حصل الزلزال قام يجرى على تحت حافى وهو بيصرخ باعلى صوته زلزال زلزال وانا والله منزلتش للشارع خالص المهم بهلول فضل يلف حوالين الشارع زى الساقيه ويصرخ ...الزلزال خلص من بدرى وهو شغال عماله يلف ..الناس فى الشارع نسيوا خوفهم ونسيوا الزلزال وفضلوا يضحكوا ويتغمزوا على بهلول ..انا بصراحه اتكسفت جدا ووشى احمر وناديت عليه وهو مش سامعنى وعماله يلف ...ناديت على اخويا الصغير من جوه وقلت له تعرف توقفه الواد زى ما يكون لقيها فرصه فى ثوانى كان فى الشارع وحط رجله فى طريق بهلول لقيته بيتكعور على الارض زى لعيبه الكوره بصراحه كنس الشارع وانا ساعتها صرخت عليه وحطيت ايدى على وشى لغايه لما قام وحمدت ربنا انه طلع سليم ..وقعد كذا سنه مش عارف مين اللى شنكله لغايه لمل اخويا قال له
المهم ارجع تانى للسنه اللى فاتت جه يصرخ ويقول بهلوله انا اتنفضت من على السرير وقلت له خير فى ايه؟؟؟؟؟؟؟
قال لى طالعين مصيف 3 1يام
بصراحه انا فرحت ونسيت الخضه وقلت له بجد؟؟
قالى حذرى رايحين فين ؟؟؟
قلت له شرم الشيخ طيب الغردقه ..اللاسكندريه..بورسعيد ..السويس...مرسى مطروح ..الاسماعيليه..دهب كل ده وهو يقول لى لا ..دخلت على سواحل ليبيا والسودان وتشاد وجزر القمر وهو يضحك ويقول لا وفى الاخر يقولى رايحين العزبه
قلت له عزبه ايه ماتخلى الطابق مستور ماحنا عارفين بعض
قال لى واحد زميلى عازمنا عنده فى العزبه 3 ايام وقعد يغنى ويرقص ويقول اما هتبقى حته فسحه يا بهلوله هنركب خيل وهنصطاد بط ووز وعصافير ويمام وها نجرى حوالين القصر بتاع العزبه
وفى الليل خرج بهلول ورغم بخله الشديد جدا اشترى بندقيه صيد وملابس جوكى خيل وطاسه من اللى بيلبسوها فى راسهم والعجيب انه اشترى 15 عصايه من اللى بيمسكوها الفرسان فى ايديهم فى افلام زمان ليه 15 واحده مش عارفه
المهم سافرنا وكانت العزبه فى القليوبيه صحانا بدرى يادوب صلينا الفجر ومشينا وعلى العنوان سألنا لغايه لما وصلنا وشفنا بيوت العزبه من بعيد قال لى وعلى وجهه علامات النصر العزبه هناك اهيه ....واول ما دخلنا العزبه فضل يزمر بالكلاكس كانه فى فرح لغايه لما خرج واحد والظاهر انه صحى على صوت الكلاكس كان غضبان جدا وقال ايه فى ايه؟؟...بهلول خاف منه بس عمل نفسه جامد وسأله فين سيدك محمد؟؟؟؟ الراجل بص له وكان هايكله قاله محمد مين وزفت مين اللى سيدى على الصبح ....رد بهلول بصوت واطى محمد عبدالهادى الراجل مسك الباب وحط ايده على الازاز بكل عصبيه وقاله احترامك انك فى بلدنا وانك ضيف ومعاك حريم بيت محمد عبد الهادى اخر بيت هناك شايفه ؟؟؟؟ بهلول مردش سكت من الخوف الراجل قال وانت راجع مش عايز اسمع صوت العربيه خالص فاهم؟؟؟؟؟
برضه بهلول مشى من غير حتى ما يكح
المهم وصلنا البيت وكان بيت ريفى ضيق وحر جدا وفيه ناموس وحشرات جدا جدا وتعبت واتخنقت 3 ايام مصيف
ملحوظه الاستاذ محمد وزوجته كانوا ناس فى غايه الادب والزوق والاحترام وكانت امنيه مراته تروح المصيف

14 comments:

عازف الناى said...

وايه يعنى انا اعرف ناس بيصيفوا فى الشارع اللى وراهم مفيش مشكله
وانا بحذرك يا بهلوله وبجدد التحذير
انا والمدونين الرجاله هنقف ضدك مع بهلول ولو وصل الامر الى اننا سوف نشترى من السوق كل السكاكين وكل اكياس البلاستيك وورينا هتعملى ايه بقى

بهلوله said...

عازف الناى
انا وانت هنا لوحدنا ورينى هتقف ضدى ازاى
انا ممكن اخرشمك متقولش بهلوله ست ضعيفه دنا اضربك بوكس واعزف عليك يا عازف مقطوعه جفنه علم الغزل

عازف الناى said...

بهلوله اعقلى دنا اعرف واسطه جامده انا ساكن جنب جوز بنت خاله ابن عم واحد كان زميله صول فى الدخليه
مدونتك هايله بجد يا بهلوله

بهلوله said...

عازف الناى متشكره جدا
والطيب احسن

الساحر said...

ايه الجمال ده بجد مدونتك رائعه جدا وساخره وفيها اخطاء بين الزوجين يجب ان نتعلم منها

عصفور المدينة said...

والله المصيف القليوبي ده أكيد أحلى من مصايف كثير
وبالمناسبة دي أدعوك لقراءة تدوينة ما علينا
http://ma-3lina.blogspot.com/2007/06/blog-post_22.html
عن المصيف

ftataljanna said...

اختى العزيزة بهلولة العسولة

انتى عارفه

انصحك ما تروحيش تصيفى بجد

هاتسمري وهاتتقرفى ومش هاتلاقى هدوم تنزلى بيها المياه لانه طبعا مش هاينفع تلبسي مايو

واى بنطلون هايخليكي تقيله ومش هاتعرفى تومى وممكن بعد الشر

تغرقى

ههههههههههه

بعد الشر طبعا

بصي يا ستي بعد فاصل الهزار ده

ولله لو حالة زوجك المادية ما تسمحش مش لازم مصيف يعني يعنى اللى عايشين فى الصحراء بيصيفوا يا سلام لو عندك بلكونه احمدى ربنا عليها صدقيني فى ناس معندهاش

احمدى ربنا يعني

واما عن الزلزال فيا ستي معلش زوجك كان لسه عريس وخايف على شبابه

واما عن اخوكى احمدى ربنا ان زوجك طيب وابن حلال وما طلقكيش فيها لما عرف انه اخوكى هو اللى وقعه :D

بس بمناسبة العزبة انا اسمع ان لبس الفروسية غالى جدا اسمع يعني اصلى يا اختى ما جربتش ولا ركبت حصان فى حياتى

المهم الراجل اهو فرح لما لقى فرصه يفسحك اشكريها له بقى ولا اييييييييييييه

بهلوله said...

الساحر
شكرا لك وده هو فعلا هدفنا انا وبهلول نشرد بعض شويه بس الناس تتعلم من اخطائنا

بهلوله said...

عصفور المدينه
المصيف القليوبى احسن فعلا من مصايف كتير ولكن شقتنا احسن من الكل وانا عملت زى دبور زن على خراب عشه

بهلوله said...

فتاه الجنه
كتكوته بهلوله
بهلول صدقينى مش على قد حاله ده جوزى وانا عارفاه وعارفه ظروفه الماديه كويس قوى
اما عن لبس الفروسيه بهلول زبون كانتو معتبر

نقطة مية said...

يا ستي اهو الراجل كتر خيره اسمه فسحك برضه...عارفة انت تاخدي مرات الاستاذ محمد و تطلعوا تصيفوا ..
تحياتي

سندباد said...

زيارة اولي ومش هاتكون الاخيرة معلش خيرها في غيرها

Sally said...

طاب ما عم بهلول طيب اهو
وداكي القليوبيه مرة واحده
وغيرك مش لاقي

ههههههههههههههههه

بوست عسول
اووووووووووووووي

Dr.khaled said...

:)

مدونات مباركة
ربنا يكرمكم