اولا يسعد صباحكم اخواتى المدونات واخوانى المدونين
وده بحكم ليدس فرست او السيدات اولا
اعرفكم بنفسى انا بهلوله طبعا الاسم ده ناس كتير هتضحك عليه لكن ما باليد حيله
اول تدوينه لى فى المدونه دى ولكن انا عندى مدونه تانيه بهلول جوزى ميعرفش عنها حاجه
حصلت النهارده خناقه بينى وبين بهلول كانت هتوصل للمأذون لكن ولله الحمد الوقت كان متأخر
احكى لكم الحكايه من الاول
انا بهلوله موظفه حكومه مطحونه فى الشغل والبيت والمواصلات ومن تحكم سى السيد بهلول اللى فاكرنى جاريه من جواريه روحى يا بهلوله هاتى يا بهلوله عيز اشرب يابهلوله عايز اكل ...المهم عايشلى فى دور هارون الرشيدى
سمعت عن المدونات قلت اعملى مدونه اطلع فيها كل اللى جوايا ...وفعلا عملت مدونه وكنت كل يوم اروح من الشغل قبل بهلول ب 3 ساعات اعمل الاكل بسرعه وانظف البيت على السريع واضربلى ساعه او ساعه الا ربع يوميا على النت اتجول فى المدونات واكتب فى مدونتى...المهم بهلول كان بيتسحب كل يوم ويروح الاوضه التانيه ويقعد على الكمبيوتر بالساعه والساعتين وانا سايباه لغايه لما سمعت فى يوم صوت كتابه على لوحه المفاتيح لانه كان ناسى يقفل الباب زى عادته
بصراحه الفار لعب فى عبي يكونش بهلول بيشيت اكيد دخل الشات ..ربنا يسامحنى مشيت على صوابع رجلى لحد باب الاوضه ووقفت لقيته بيكتب بوست على البلوجر امت راجعه ومشيت عادى ودخلت عليه ..ولان بهلول غلبان ومعندهوش خباسه مقفلش الجهاز مع ان فى زرار فى المشترك انا كنت باستعمله لما الاقيه جه من الشغل وانا على الكمبيوتر
المهم.لقيته ساب الجهاز واللتفت لى ووسع عنيه وكبر مناخيره معرفش ازاى وقالى بصوت عالى بهلوله ايه اللى صحاكى دلوقتى ؟؟ قلتله هو ممنوع اصحى الا فى ميعاد ولا ايه ؟؟ قالى لا براحتك بس انا عامل عليكى عندك شغل الصبح ..قلتله طيب مانت عندك شغل زيى زيك ...قالى بس انا نمت بالنهار .قلتله من الاخر انت بتدون قالى وانتى تعرفى منين التدوين قلت بصراحه وعلى المكشوف انا عندى مدونه ...قالى ازاى هو انا طرطور فى البيت ياست هانم ولا ايه..قلتله بهلول اشمعنى انت عندك مدونه قال انا راجل قلت ودى كمان فيها راجل من ست قاللى لا ست ولا بت يا مدام الكمبيوتر بكره هيتباع ولا انا ولا انتى وقام دايس على الزرار وقفله وخد فى وشه وعلى السرير طوالى ..رحت انام لقيته نايم فى اخر بلاد السرير امت انا واخده الطرف التانى ونمت
شويه ولقيته بينادى بهلوله انتى نمتى ؟ بصراحه طنشت وعملت نفسى مش من هنا قام منادى تانى بهلوله بهلوله بهلوله قلت له نعم قالى عندى حل نعمل مدونه احنا الاتنين قلت له ازاى قالى مدونه نكتب فيها اللى عايزينه قلت له مينفعش نعمل اسم واحد ومدونتين برقم سرى واحد قاللى موافق وقمنا نعمل المدونه واصر ان يكتبها باسم بهلول ولكنى قلت له فين حقوق المراه الللا كنت مؤمن بيها قاللى خلاص موافق بس بشرط كل واحد يكتب بمزاجه ومحدش يزعل من حد وواقفت وحبيت اقوللكم علشان احكى لكم براحتى على مشاكلى معاه هو والشغل والمواصلات
Subscribe to:
Post Comments (Atom)
8 comments:
ألف مبروك يا ست بهلوله على المدونة
.. وحظى لو انا أول المعلقين فى المدونة بتاعتك .. وهروح اعلق عند بهلول برضه هناك ..
وألف سلامة لدماغك .. وربنا يشفيكوا وترجعلك الذاكرة
تحياتى
سبقنى ياسر ماشى ياست بهلوله انا تانى واحد يعلق عندك
وسلامى لبهلول
ياسر سليم
مرحب بيك يا خويا اول واحد تعلق عندى منور يايسور
بس انا زعلانه قوى منك تعلق عندى وتروح تعلق عند بهلول يرضيك انا اتعب وبهلول يخدها على الجاهز نصيحه منى بلاش تعلق عنده اقلبه
عازف الناى
ولا يهمك تاخد الميداليه الفضيه
بس انا اسالك سؤال من غير احراج انت عازف بجد ولا ده لقب
بداية جميلة وقوية يا بهلوله
قصدي مدام بهلولة عشان بهلول ميزعلش
وطبعاً بما اني هتابع المدونة هعتبر كل اللي هتحكية مش قصه تم تالفها وانما هي حقيقة من واقع الحياة
ربنا يعينك يا بهلوله
ايه ده يا ست بهلوله ده والله انتى قمر ودمك زي السكر بجد بجد هاستني كل تدويناتك
وربنا يمن على بنات المسلمين اللي من غير جواز ويبقوا بهلولات عسولات زيك كده
بصراحة
انتم الإتنين دمكم شرِباااات
يارب كل المجوزين يبقوا كده بهاليل
وأنا سعيد إنكم وصلتم لحل يرضي جميع الأطراف وفعلاً البهللة بما بتكون من القلب بتبقى لذيذة جداً
علىفكرة بهلله يعني فضفضة للترجمة
ويارب دايماً موفقين ومتفقين وربنا يسعدكم وتعيشوا أحلى ايام البهللة وتملوا البيت كده بهاليل صُغيرين
وشكرا
Post a Comment