Monday, July 2, 2007

صباحه كرشه

البيه خرج دلوقتى بعد الماتش بتاع الاهلى والزمالك وشد الستاره الحمرا اللى على الشباك بتاع المنور وخرج مع العيال اللى ماشيين يقولوا اهلى اهلى .....خليه انشاءالله يجى الفجر زى كل ماتش وبكره ينام فى البيت وبلاها شغل.ماهو اصله مصاحبلى واحد لاسع زيه فى الدور الرابع كل ماتش يكسبوه يخرجوا مع العيال فى الشارع
بس كله كوم واللى حصل يوم ما مصر فازت بكاس اقريقيا كوم ..اول ما خلص الماتش لقينا جرس الباب عمالا يضرب فتح الباب وقعدوا يخدوا بعض بالحضن ويتنططوا وكان صاحبه جايب معاه دف بهلول غلبان دماغه على قده دخل المطبخ وجاب حله وجرى وانا انادى عليه وهو يابو فكيك على تحت
الفجر لقيته جاى من غير الحله وهدومه متبهدله ولابس فرده جزمه واحده
اول ما دخل كنت مستنياه وعينى بطق شرار شفت منظره قعدت اضحك عليه ربع ساعه وقلت له طيب جايب ليه الفرده بتاعت الجزمه هتستنسخها وتطلع فرده تانى وحتى لو استنسختها دى شمال واللى هتستنسخها هتطلع شمال برضه
كل ده وانا عماله اتكلم معاه واضحك عليه وهو ولا هو هنا غير هدومه واترمى على السرير وحتى مقليش تصبحى على خير وانا بصراحه كان صعبان عليا قوى قوى ...لامش بهلول اللى صعبان عليا ...كان صعبان عليا الحله
علشان كده اتعودت لو فيه ماتش اخبى الحلل واخليله الطاسه بتاعت القليه حتى لو خدها يرحمنى من نضافتها ...لكن من ساعه ما عورته فى تمن الحله وخدت منه قد تمنها تلات مرات وهو بيخاف يدخل المطبخ
المهم المره دى برضه هعوره فى تمن الستاره ولا معنديش حق

17 comments:

huda gamal said...

مدام بهلوله :
اسعدتنى زيارتك لمدونتى ودخلت اشوف مدونتك الجديده.. انا عرفت القصه وشفت مدونة الاستاذ بهلول كمان بس بما انى بنت فطبعا لازم هبقى من أنصارك وهعلق عندك الاول واكتر:)
موضوع الكوره ده بقى جالى فى وقته ..
بجد هى الناس بقى ليها فى الكوره اوى اكتر من اى حاجه فى الدنيا، دى بقت ظاهره خطيره ومتفشيه..
انا بصراحه ماليش فى الكوره خالص بس بعرف ان فى ماتش من اصوات الناس هووووو وهىىىى يااااااا
كلها مؤثرات صوتيه بعرف منها بردو النتيجه يعنى لما الاقى ابن عمى فوقينا بيقول هييييييه يبقى الاهلى جاب جون ولما الاقى الصوت جاى من تحت يبقى الزمالك هو اللى جاب جون عشان ابن عمتى زملكاوى وهكذا..
اظاهر ان من كتر ماالناس حاسه بالفشل والهزيمه فى كل حاجه قررت ان انتمائتها تبقى كرويه على اساس ان المعارك الكرويه اسهل واسرع وابسط الفوز فيها ..
اسفه على التطويل يا مدام بهلوله دى عادتى على فكره ارجو انك تستحمليها

عصفور المدينة said...

مبروك المدونة وسعيد بتشريف حضرتك ومرحبا بعائلة البهاليل
والبهاليل في اللغة الكرام الأصول
أما موضوع الكورة فأنا باكون سعيد جدا لما اتمشى وقت الماتش بس المشكلة
عيييييييييييييه
اللي كل شوية يطلعوا بيها وربنا يعافينا
وإلى الأمام وعايزين بقية التقاطيع

ftataljanna said...

مدام بهلولة

بصي كل الناس بتقول مدام اسمحيلى ولو ما سمحتيش هاقول لك مدام

بصي يا بهلولة يا اختى والله اانا مؤدبة وبكلم اخواتى بابله وكده بس يعني بما ان بهلولة لقب مش اسمك فخلاص ولا ايه

اما عن الكورة

فبصراحة مت من الضحك هو كلامك ده حقيقي يعني جوزك جرى له كده فعلا

انا مش كروية اوى كده مش كروية خالص اصلا وبيني وبينك بتضايق من اللى عاملينها حاجة جامدة يعني

بس الظاهر ان الاخت هدى جمال عندها حق في رايها

ومستنياكى

ftataljanna said...

بس صحيح فين مدونتك القديمة عايزة اشوفها الله يخليكي

عازف الناى said...

اهلا مدام بهلوله ولا اقولك سعيده
ياريت تصالحى بهلول والطيب احسن
وبعدين موضوع الكوره يعنى كل كام سنه بناخد كاس افريقيا مش مهم قوى حله

عازف الناى said...

اه نسيت سلامى لبهلول
احسن يزعل

حسن ارابيسك said...

بهلووووولة
أولاً
الأسم مزيكا فيه موسيقى احلى من موسيى صوت الحلل

ثانياً
صحيح اللي يشوف حلت غيره تهون عليه حلِتُه
وقالوها زمان
الطاسة السوده تنفع في اليو الأخبر

ثالثاً
أنا مافتنيش ارحب بتشريفك في مدونتي وقلت ياواد ياارابيسك لازم تعمل لبهلولة زيارة وترد الواجب إنت برضه تعرف الاُصول
وأنا داخل مدونتك الساخرة الباهرة دخلت برجلي اليمين وبشويش عشام ماخبطش في الحلل
وشكراً للإستضافة والتعقيب

بهلوله said...

هدى جمال
انا سعيده جدا بيكى واتكلمى براحتك احنا بنحب كده
بس عايزه منك خدمه متعلقيش عند بهلول
احنا ولايا ونعلق عند بعض لحسن كل ما يلاقى تعليق عنده يقعد يغظنى زى العيال الصغيرين

بهلوله said...

عصفور المدينه
هى بهاليل معناها كرام الاصول بجد
يابن الايه يابهلول هخليه يغير اسمه

بهلوله said...

فتاه الجنه
صدقينى اللى حصل ده فعلا حصل ودى يومياتى انا وبهلول
وهو بطبيعته غلبان وبيعمل حاجات فعلا غريبه
واقولك الاكثر غرابه من كتر ما كنت باحكى لزمايلى عن افعال جوزى المضحكه هما اللى سموه بهلول وفرحت قوى فيه على الاسم ده لكن بعد كده سمونى بنات الايه بهلوله

بهلوله said...

فتاه الجنه
والله عندى مدونه تانيه
لكن مقدرش اقول عليها لحسن بهلول لو قراها يطلقنى
يرضيكى اطلق

بهلوله said...

عازف الناى
مانت باين عليك من صحابه

بهلوله said...

عازف الناى
اه نسيت ياريت تنورنا دائما
بس هنا عند بهلول لا

بهلوله said...

حسن ارابيسك
نورتنا جدا يا ابو على
ونتمنى نشوفك دايما
وخلى بالك انت بتقول انك دخلت برجلك اليمين انا مصدقاك ومش راح احلفك

ftataljanna said...

طبعا لا ما يرضينيش تتطلقى يا خبر ابيض

هاقول لك انا عايزة اشوفها باى طريقة فابعتيهالى على ايميلى ماشى يا قمر

ftatalganna@gmail.com

ftataljanna said...

ftataljanna@gmail.com

معلش كتبته فى التانى غلط

ftataljanna said...

اه وعلى فكرة

حرام تحكى لزمايلك فى الشغل عن جوزك

لان دى من اسرار البيوت يا قمر وشفتى النتيجة سموا جوزك بهلول وسموكى بهلولة

وكمان لو سترتيه بثوبك لكان خير لك

ياللا يا قمر قبلاتى