Friday, July 20, 2007

شكرا لكل من سال عنى


سعيده يا احلى بشر
اخواتى المدونات اخوانى المدونين
ليدس فرست
اشكركم جدا جدا جدا
اتوجه بالشكر للبنت الجميله ذات الاسم اللى على مسمى فتاه الجنه وهى انشاء الله من اهل الجنه اشكرها كتيييييييييييييييييييييير قوى وللصبح ولو هى قدامى دلوقتى كنت حدفتها بالورد من النوع الغالى مش النوع اللى كان بهلول بيجيبه فى المستشفى ابو تلاته جنيه الا ربع وطول ما هو قاعد جنبى عمال يذلنى شمى يابهلوله .......ده ورد يا بهلوله......ده من الغالى يا بهلوله........شمى وانتى تروقى يا بهلوله.........انا جايب ورد زى الافلام يا بهلوله........انا عملك زى البطله يا بهلوله...... انتى مش عارفه انا صارف كام لغايه دلوقتى يا بهلوله
العمليه مكلفانى كتير يابهلوله
وطبعا فى سره عماله يقول الله يخرب بيتك يا بهلوله
لكن اقولكم على سر بهلول وقف جنبى وانا فى المستشفى جامد قوى وانا سعيده بكده ولو انه كان بياكل اكلى وكل الفاكهه اللى كان الناس بيجبوها وكل ما اقوله هات حته يا بهلول يقولى النظام الغذائى يا بهلوله لازم تحفظى عليه
طب كل بره الاوده يا بهلول علشان ريقى بيجرى على الفاكهه
يقولى .-عايزانى اكل قدام الناس يا بهلوله انتى بصى الناحيه التانيه وانا باكل
اجيبه يمين اجيبه شمال هو هو مش نافع معاه اى حاجه
وكمان اشكر كل من سأل عنى وكل من كتب لى كلمه فى مدونتى وكل من كتب لى فى مدونه فتاه الجنه
واتوجه بالشكر لبهلول ولو انه مش فاضى من امبارح من ساعه ما روحنا البيت وهو جايب ورقه وقلم وعماله يحسب
صرف كام ويقول الارقام بصوت عالى وانا مطنشه على الاخر

18 comments:

Qabbani said...

حمد لله على سلامتك , وان شاء الله يكون كل شي تمام التمام ,

و تحياتي لبهلول عشان خلنا على اطلاع بظروفك و خبرنا

بهلوله said...

MQabbani
انا سعيده جدا بوجودك
ومتشكره على متابعتك
بس قولى
انطق اسمك ازاى
بجد والله مش عارفه

عصفور المدينة said...

حمدا لله على سلامتك يا سيدي
وبعدين أنا ما جبتش الفاكهة عشان صديقنا اللي كان محتل المدونة في غيابك ما يكالهاش وبعدين برضه خايف عشان نظامه الغذائي مش يتلخبط

والحمد لله إن العملية ما جاتش على الحس الفكاهي بتاعكم

تاني باقول حمدا لله على السلامة
وربنا يكفر عنكم من سيئاتكم ويرفع درجاتكم

Qabbani said...

موفق اسمي

و العائلة قباني

قولي قباني و خلاص :)

بهلوله said...

عصفور المدينه
جدع بهلول فعلا كان هياكل المدونه كلها مش الفاكهه بس
تصدق انا بخبى منه العلاج بتاعى

بهلوله said...

MQabbani
مرحبا بك استاذ قبانى
واعتبر المدونه مدونتك

حسن ارابيسك said...

الف حمد على سلامتك ورجوعك بالسلامه
ونورتي البيت على بهلول انا سمعت سبب الوعكة كان افراط في الطعام عموما بالهنا والشفا
وعشان كده عازمك على طبق فول في مدونتي

ftataljanna said...

بهلولتى

حمدا لله عالسلامة يا قمر

ربنا يتم شفاكى على خير

وانتى كمان وحشتيني اوى

انا ماكنتش مصدقه انك رديتي عندى

حمدا لله على سلامتك ومستنيينك على نار

بس ايه يا شيخة حرام عليكي ارحمى بهلول بقى شوية :)

طيب والله كان زعلان علشانك :)

والا كان هايصور لك البوست

انا عارفه انك عارفه اللى بقوله بس بستهبل :)

بجد مستنياكى ترجعى بالسلامة
وسيبك من البوست عندى خالص ده الناس اللى بصحتهم كانوا هبطوا على ما وصلوا للآخر

كانهم طالعين سلم :)

لما تبقى كويسه نشوفك ان شاء الله

عازف الناى said...

حمدا لله على عودتك الحميده
وحرام عليكى بهلول بيحبك براحه عليه شويه

mohand said...

السلام عليكم
حمدلله علي السلامه
وان شاء الله تكوني افضل

وحافظي علي النظام الغذائي بقي واسمعي كلام بهلول

ربنا يخليكم لاولادكم ويخليكم لبعض

اخيكي مهند

بهلوله said...

حسن ارابيسك
اهلا بيك ابو على
انا رحت مدونتك علشان اسلم عليك وااكل الفول
لقيتك ناسى العيش
هنغمز بايه يا حسن
وسبب الوعكه لم يكن الافراط فى الطعام
كانت عمليه حصوه

بهلوله said...

فتاه الجنه
نورتينى يا اجدع بنوته
انا لسه هاشتكى من بهلول ده عمل معايا عمايل
ولا اقولك بعدين
سلامى وتحياتى

بهلوله said...

عازف الناى
وحشنى والنبى عازفك
شكرا على اهتمامك
من كل قلبى

بهلوله said...

مهند
انت عارف انا لو سمعت كلام بهلول
هيملى البيت بلى ونوه مشمش وكازوز
وطالع لى دلوقتى ياخويا فى الاساتك
كل يوم يشترى اساتك ويجيب ورق ويقعد ينشل على الناموس

شاب نفسة يحقق حلمة said...

الف خمد الله علي السلامه يا بهلوله
انا مش كنت اقصد حاجه والله من الناس اللي بيجيبو في سيرتك
انا عرفتك عن طري البن اللي اسمها
فتاه الجنه
انا اسف لو الكلمه ضايقتك
تحياتي ليكي وحمد الله علي السلامه كمان مره
سلام

بهلوله said...

شاب نفسه يحقق حلمه
ومين قال انى انا زعلانه
بالعكس انا مبسوطه جدا ان حد يتكلم على مدونتى
ولو هاقعد للساعه تلاته الاخمسه اشكر فتاه الجنه لن اوفيها حقها

أمــانــى said...

حمدلله على سلامتك نورتى بيتك ومدونتك
وربنا يديك الصحة دايما يااااااااااارب آمـــــــــين
معلش بقى اعذرى بلهول اصله مسكين عايش فى زمن ما يعلم به الا ربنا
الف سلامة عليكى وحمدلله على سلامتك

بهلوله said...

امانى
اشكرك على كلامك الرقيق
اما بهلول
الزمن هو اللى بيشتكى من بهلول
اشكر لكى تشريفك لبهلوله