سعيده يا بشر
سى السيد بهلول صحى من سباته ودون تدوينه ضدى
على العموم جنت على نفسها براقش
وانا اليوم فاضيه لبهلول وهافرش له الملايه وهفرج عليه حوارى المدونات
دا نوادره بالحيل اكوام اكوام
من سنتين وفى اول رمضان دخل عليا المحروس بهلول التاسع عشر حفيد محمد صلاح عبده ملك بلاد الترعتين ومؤسس الحضاره النطاطيه ...حضاره النط بالحبل وهو على الارض..جانى ومعاه 3 كور كفر من النوع الغالى وعليهم امضاء رونالدو بالعربى ...انا متاكده ان البائع هو اللى ماضى له عليهم...المهم وجايب معاه كمان 2 شبكه بتاعه الجون و3 شورتات و3 فانلات عليهم ارقام بس المضحك انهم نفس المقاس ونفس اللون ونفس الرقم باين عليه عامل لهم كوبى بست ..وقالى بهلوله انا هاشترك فى الدوره الرمضانيه المركزيه لكره القدم.....الاسم لوحده خلانى افتكر انه هيلعب فى كاس العالم للاجداد
المهم كل يوم يرجع من الشغل يلبس الشورت والفانله وياخد معاه بقيه اخوتهم فى شنطه رياضه ويمسك كوره وينزل....بصراحه فوت علينا عزومات رمضان كلها ...بحجه انه مشغول بالدوره
وفى يوم وكان حوالى 18 او 19 رمضان خبط الباب قلت لنفسى مين يا بت يا بهلوله اللى بيخبط طب ما فى قدامه جرس وتحت انتر كم المهم بصيت فى العين السحريه لقيت طفل صغير فتحت الباب قالى ازيك يا طنط بهلوله
قلت له وانا مستغربه ازاى عرف اسمى ازيك يا حبيبى عاوز مين ؟؟
قالى عم بهلول بيقولك هاتى كوره من دولابه علشان الكوره التانيه سكنت
انا مش عارفه يعنى ايه سكنت فسالته سكنت ازاى فسكت الولد حايلته وطبطبت عليه وسالته قالى بصراحه عم محمد البواب خدها مننا ومش عاوز يديها لحد ولا لعم بهلول
قلت له هو انت بقى اللى بتلم لهم الكور
قالى انا كابتن الفريق
قلت له وبقيه الفريق قد ايه
قالى كلهم قدى
قلت له وعمك بهلول بيلعب معاكم ؟
قالى لا ده هو الحكم ومبيرفش يحكم الفاول يحسبها لمسه يد والاوت كرنر والاوفسيت بلنتى
قلت له وليه كل ده شوفو حكم غيره
قالى ما هو اللى مشترى لنا الفانلات والشورته والكور وبيدينا جوايز الفايز والمغلوب وبقعد معانا بعد الماتش يلعب معانا بلى للمغرب
الواد صدمنى طب ليه كده يا بهلول .....بلى فى الشارع ...وكوره مع العيال
واول ما جه وقلت له ما سمعته
قالى ايه يا بهلوله الاطفال احباب الله خلى مخك كبير
قلت له يا بهلول ايوه الاطفال احباب الله لكن منظرك ايه لما البواب ياخد منك الكوره وميرضاش يدهالك وتقعد تلعب بلى فى الشارع حرام عليك انتى فى الاربيعينات
سكت وتانى يوم لبس الفانله والشورت وخد معاه كيس البلى اللى مان بيخبيه فى الشنطه
حد يرضيه كده ؟؟؟؟؟؟؟؟
18 comments:
ياعيني عليكي يا بهلولة
وقعتي مع واحد معش طفولته
وبيعيشها دلوقتي
يعني انتي دلوقتي ماما وبابا والداده بتاعته
ده تلاقي المستخبي اكتر من كده
ان افضل تفضضيله غرفه له هو اصحابه الصوغيرين يلعبوا فيها كل يوم وبراحتهم بقة ولا بواب ولا جار ولا حد في الشارع يزعق لهم ولا حاجه
وياترى بيعمل واجب المدرسة كل يوم ولا هو مش فالح غير في اللعب وبس
عيني عليكي يا بهلوله
مسكينه تلاقيكي طول اليوم تكلمي نفسك وتقولي
كنتي فين يا لا لما قولت أه
والناس خيبتها ست وحد وانتي خيبنك ما وردتش على حد
أهو لعب البلي رياضة برضه
وبعدين ده لعب الكورة في الشارع حلو جدا للركب
خاصة لما يقع
السلام عليكم
بتتكلمي بجد؟
الكورة رياضه حلوه ومفيده بس البيلي ايه ظروفه بقي؟
عموما حاجه غريبه فعلا
-----------
انتي شوفتي تعليقي علي البوست السابق؟
حسن ارابيسك
انت بتقول فيها
انا ساعات اندب حظى مع بهلول
وما خفى كان اعظم
هو غلبان قوى ومسكين قوى وطفل قوى
ومجننى قوى قوى قوى
لكن فى شغله يا خويا لهلوبه
انا خايفه يكون شغال فى حضانه بعد الظهر
لانى عارفه شغله وعارفه مكان عمله
لكن ممكن يعملها
اى حاجه ممكن الاقيها فى بهلول
وشكرا
عصفور المدينه
ماهو لما يقع على ركبه
انا برضه اللى هاحوث بيه
وهيقعد يلالى زى صحابه الصغيرين
والكابتن بتاعهم
mohand
صدقنى والله اللى كتابته ده بجد
وهو لو غير صحيح مش هيسكت بهلول وهيكدبنى فى مدونته
وانا بتحداه انه يكدبنى فى اى كلمه كتبتها
ولسه انا مكتبتش حاجه عن نوادره الكتيره قوى
بس ارجو انك تصدقنى حتى لا اضطر للحلفان كثيرا
تعيقك السابق قراته ورديت عليه
واسفه على التاخير
كله بسبب
صاحبنا
بهلول
ربنا يجعل كلامنا خفيف عليه
يا بهلولة
يا بهلولة
بلاش التسييح ده
بس ايه ده للدرجة دى يلعب بلى مع العيال للمغرب فى رمضان ومشقلب حال الماتش علشان يبقى حكم
وكماااااااان بيرشي العيال علشات يسيبوه يحكم
ربنا يعينك يا بهلولتى
هو انتوا عندكوا اولاد ؟
ايه يا بهلوله
ماتسبيه يلعب بلى براحته
وانتى مالك
مش بره الشقه
لو جوه الشقه جوزك منقدرش نقول حاجه
لكن بره الشقه مواطن مصرى من حقه ان يلعب بلى ونوه مشمش وكازوز كمان
وكان من حقك الاعتراض خلال 30 يوم من لعبه البلى
لكن اسفين المده انتهت
فتاه الجنه
هو انا لسه سيحت سبينى يا اختى اطلع من على صدرى كل المكتوم من بهلول
ده لسه كمان وكمان
عازف الناى
انتهت انتهت يا خويا الارزاق بالله
انتو كده يا بتوع حقوق الانسان
ما بتجوش غير على الغلابه
ولا يمكن بهلول مفتح مخه معاك
على العموم يا مفتح انت وهو
انا هاشتكى للى معندهوش مده محدده للشكوه
ما شاء الله
اية الانتاج الجميل ده
11 بوست ورا بعض؟
عيني عليكي بااااااااااااااادة
ههههههههههههههههههه
لالا انا بهزر
ما شاء الله
تحياتي
ما شاء الله عليكي
اسلوبك زي العسل
وبعدين ومالوا يا بهلولة ما تسيبيه يلعب
لعب الشارع دا مالوش منافس
المهم لما بيلعب بلي بيكسب ولا العيال بيضحكوا عليه وياخدوا منه البلي
حاسبي على نفسك
اوعي بهلول يجننك بجد
انا اول مرة ادخل مدونتك النهارده
وقرات كل موضوعاتك
طريقتك واسلوبك اكثر من رائعين
سلام يا مجنونة بهلول
بهلولة , بالنسبة لتعليق عندي انتي ما علبيكي بالباقي:)
انتي اكتبي بالعربي :)
و تحياتي لك
Islamist Bloke
مرحبا بك
ومدونه بهلوله فى انتظارك دائما
ما علينا
انا على طول اشوف البلى اللى معاه جديد
اكيد بيخسر ويشترى من جديد
وصدقنى انا لو عايزه اجنن عشره زيه اعملها
لكن باقول حرام
وهو مش فاهم حاجه
MQabbani
ماشى هاعلق بالعربى احسن
الارض بتتكلم عربى
الله يرحمك رحمة واسعة
والله جلست اقرأ فى أغلب التدوينات وبقيت محتار أضحك ولا أبكى
الله يرحمك
شركة تنظيف فلل بالجبيل
شركة تنظيف شقق بالجبيل
Post a Comment