Friday, July 27, 2007

لعب العيال


سعيده يا بشر
سى السيد بهلول صحى من سباته ودون تدوينه ضدى
على العموم جنت على نفسها براقش
وانا اليوم فاضيه لبهلول وهافرش له الملايه وهفرج عليه حوارى المدونات
دا نوادره بالحيل اكوام اكوام
من سنتين وفى اول رمضان دخل عليا المحروس بهلول التاسع عشر حفيد محمد صلاح عبده ملك بلاد الترعتين ومؤسس الحضاره النطاطيه ...حضاره النط بالحبل وهو على الارض..جانى ومعاه 3 كور كفر من النوع الغالى وعليهم امضاء رونالدو بالعربى ...انا متاكده ان البائع هو اللى ماضى له عليهم...المهم وجايب معاه كمان 2 شبكه بتاعه الجون و3 شورتات و3 فانلات عليهم ارقام بس المضحك انهم نفس المقاس ونفس اللون ونفس الرقم باين عليه عامل لهم كوبى بست ..وقالى بهلوله انا هاشترك فى الدوره الرمضانيه المركزيه لكره القدم.....الاسم لوحده خلانى افتكر انه هيلعب فى كاس العالم للاجداد
المهم كل يوم يرجع من الشغل يلبس الشورت والفانله وياخد معاه بقيه اخوتهم فى شنطه رياضه ويمسك كوره وينزل....بصراحه فوت علينا عزومات رمضان كلها ...بحجه انه مشغول بالدوره
وفى يوم وكان حوالى 18 او 19 رمضان خبط الباب قلت لنفسى مين يا بت يا بهلوله اللى بيخبط طب ما فى قدامه جرس وتحت انتر كم المهم بصيت فى العين السحريه لقيت طفل صغير فتحت الباب قالى ازيك يا طنط بهلوله
قلت له وانا مستغربه ازاى عرف اسمى ازيك يا حبيبى عاوز مين ؟؟
قالى عم بهلول بيقولك هاتى كوره من دولابه علشان الكوره التانيه سكنت
انا مش عارفه يعنى ايه سكنت فسالته سكنت ازاى فسكت الولد حايلته وطبطبت عليه وسالته قالى بصراحه عم محمد البواب خدها مننا ومش عاوز يديها لحد ولا لعم بهلول
قلت له هو انت بقى اللى بتلم لهم الكور
قالى انا كابتن الفريق
قلت له وبقيه الفريق قد ايه
قالى كلهم قدى
قلت له وعمك بهلول بيلعب معاكم ؟
قالى لا ده هو الحكم ومبيرفش يحكم الفاول يحسبها لمسه يد والاوت كرنر والاوفسيت بلنتى
قلت له وليه كل ده شوفو حكم غيره
قالى ما هو اللى مشترى لنا الفانلات والشورته والكور وبيدينا جوايز الفايز والمغلوب وبقعد معانا بعد الماتش يلعب معانا بلى للمغرب
الواد صدمنى طب ليه كده يا بهلول .....بلى فى الشارع ...وكوره مع العيال
واول ما جه وقلت له ما سمعته
قالى ايه يا بهلوله الاطفال احباب الله خلى مخك كبير
قلت له يا بهلول ايوه الاطفال احباب الله لكن منظرك ايه لما البواب ياخد منك الكوره وميرضاش يدهالك وتقعد تلعب بلى فى الشارع حرام عليك انتى فى الاربيعينات
سكت وتانى يوم لبس الفانله والشورت وخد معاه كيس البلى اللى مان بيخبيه فى الشنطه
حد يرضيه كده ؟؟؟؟؟؟؟؟

18 comments:

حسن ارابيسك said...

ياعيني عليكي يا بهلولة
وقعتي مع واحد معش طفولته
وبيعيشها دلوقتي
يعني انتي دلوقتي ماما وبابا والداده بتاعته
ده تلاقي المستخبي اكتر من كده
ان افضل تفضضيله غرفه له هو اصحابه الصوغيرين يلعبوا فيها كل يوم وبراحتهم بقة ولا بواب ولا جار ولا حد في الشارع يزعق لهم ولا حاجه
وياترى بيعمل واجب المدرسة كل يوم ولا هو مش فالح غير في اللعب وبس
عيني عليكي يا بهلوله
مسكينه تلاقيكي طول اليوم تكلمي نفسك وتقولي
كنتي فين يا لا لما قولت أه
والناس خيبتها ست وحد وانتي خيبنك ما وردتش على حد

عصفور المدينة said...

أهو لعب البلي رياضة برضه
وبعدين ده لعب الكورة في الشارع حلو جدا للركب
خاصة لما يقع

mohand said...

السلام عليكم
بتتكلمي بجد؟
الكورة رياضه حلوه ومفيده بس البيلي ايه ظروفه بقي؟
عموما حاجه غريبه فعلا
-----------
انتي شوفتي تعليقي علي البوست السابق؟

بهلوله said...

حسن ارابيسك
انت بتقول فيها
انا ساعات اندب حظى مع بهلول
وما خفى كان اعظم
هو غلبان قوى ومسكين قوى وطفل قوى
ومجننى قوى قوى قوى
لكن فى شغله يا خويا لهلوبه
انا خايفه يكون شغال فى حضانه بعد الظهر
لانى عارفه شغله وعارفه مكان عمله
لكن ممكن يعملها
اى حاجه ممكن الاقيها فى بهلول
وشكرا

بهلوله said...

عصفور المدينه
ماهو لما يقع على ركبه
انا برضه اللى هاحوث بيه
وهيقعد يلالى زى صحابه الصغيرين
والكابتن بتاعهم

بهلوله said...

mohand
صدقنى والله اللى كتابته ده بجد
وهو لو غير صحيح مش هيسكت بهلول وهيكدبنى فى مدونته
وانا بتحداه انه يكدبنى فى اى كلمه كتبتها
ولسه انا مكتبتش حاجه عن نوادره الكتيره قوى
بس ارجو انك تصدقنى حتى لا اضطر للحلفان كثيرا
تعيقك السابق قراته ورديت عليه
واسفه على التاخير
كله بسبب
صاحبنا
بهلول
ربنا يجعل كلامنا خفيف عليه

ftataljanna said...

يا بهلولة

يا بهلولة

بلاش التسييح ده

بس ايه ده للدرجة دى يلعب بلى مع العيال للمغرب فى رمضان ومشقلب حال الماتش علشان يبقى حكم

وكماااااااان بيرشي العيال علشات يسيبوه يحكم

ربنا يعينك يا بهلولتى

هو انتوا عندكوا اولاد ؟

عازف الناى said...

ايه يا بهلوله
ماتسبيه يلعب بلى براحته
وانتى مالك
مش بره الشقه
لو جوه الشقه جوزك منقدرش نقول حاجه
لكن بره الشقه مواطن مصرى من حقه ان يلعب بلى ونوه مشمش وكازوز كمان
وكان من حقك الاعتراض خلال 30 يوم من لعبه البلى
لكن اسفين المده انتهت

بهلوله said...

فتاه الجنه
هو انا لسه سيحت سبينى يا اختى اطلع من على صدرى كل المكتوم من بهلول
ده لسه كمان وكمان

بهلوله said...

عازف الناى
انتهت انتهت يا خويا الارزاق بالله
انتو كده يا بتوع حقوق الانسان
ما بتجوش غير على الغلابه
ولا يمكن بهلول مفتح مخه معاك
على العموم يا مفتح انت وهو
انا هاشتكى للى معندهوش مده محدده للشكوه

Islamist Bloke said...

ما شاء الله

اية الانتاج الجميل ده

11 بوست ورا بعض؟


عيني عليكي بااااااااااااااادة


ههههههههههههههههههه

لالا انا بهزر

ما شاء الله

تحياتي

ما علينا said...

ما شاء الله عليكي

اسلوبك زي العسل
وبعدين ومالوا يا بهلولة ما تسيبيه يلعب
لعب الشارع دا مالوش منافس

المهم لما بيلعب بلي بيكسب ولا العيال بيضحكوا عليه وياخدوا منه البلي
حاسبي على نفسك
اوعي بهلول يجننك بجد

انا اول مرة ادخل مدونتك النهارده
وقرات كل موضوعاتك
طريقتك واسلوبك اكثر من رائعين

سلام يا مجنونة بهلول

Qabbani said...

بهلولة , بالنسبة لتعليق عندي انتي ما علبيكي بالباقي:)

انتي اكتبي بالعربي :)

و تحياتي لك

بهلوله said...

Islamist Bloke
مرحبا بك
ومدونه بهلوله فى انتظارك دائما

بهلوله said...

ما علينا
انا على طول اشوف البلى اللى معاه جديد
اكيد بيخسر ويشترى من جديد
وصدقنى انا لو عايزه اجنن عشره زيه اعملها
لكن باقول حرام
وهو مش فاهم حاجه

بهلوله said...

MQabbani
ماشى هاعلق بالعربى احسن
الارض بتتكلم عربى

Anonymous said...

الله يرحمك رحمة واسعة

والله جلست اقرأ فى أغلب التدوينات وبقيت محتار أضحك ولا أبكى

الله يرحمك

ابوعدي للتسوق said...


شركة تنظيف فلل بالجبيل
شركة تنظيف شقق بالجبيل